14th Indian President thar Ram Nath Kovind

0 Fox Journal Thursday, 20 July 2017

The 14th President of India, Ram Nath Kovind.

Fox Journal | CCPur: India President ni lai mek Pu Pranab Mukherjee chu a term (Kum 5) 25 July, 2017 khin a tawp ta ding le inzawmin July 17, 2017 khan India President ding thlangna vote thlak a nih a. NDA candidate Pu Ram Nath Kovind (71) chun a khingpui opposition candidate Meira Kumar (72) hneban in India President Office 2017 a inthawk 2022 chen a chel ta ding a nih.

Hi vote thlakna hi India PM Pu Modi in a thlak hmasatak a nih. Tuta tum a Presidential election hi vote thlak that tum tak a hriet a ni a, 99% deu thaw vote a tla niin returning officer chun a hril.

Vote hi a rengin 4,895 a um a, MLA hai vote 4,120 le elected MP 776 hai chu vote thlak thieng a pawm an nih a. An ni laia thang ve thei lo Madhya Pradesh Minister Narottam Mishra chu paid news le inzawma thubuoi a nei leiin a vote disqualify pek niin vote a thlak ve thei naw a nih.

President thar hi Kanpur, Uttar Pradesh a peng a nih a, BJP Political party a thang lai mek a nih.

Kanpur College a inthawk in Law degree la in a graduate a. Politics ah a lut hma po hin advocate sin a thaw a nih. Kum 1971 khan Savita Kovind chu a nuhmei dingin a nei a. Nau pasal pakhat le nau nuhmei pakhat an nei a nih.

Law a graduate zo hin Civil Service Exam vawihni lai a pek a, a hlawsam ve ve a. BJP National Spokesperson a hmang a lo ni tah a. Kum 2015 August khan India President in 35th Bihar Governor dingin a lo namdet ta bawk (16 August, 2015 – 20 June, 2017).

Kovind hi Rajya Sabha MP ah tum hni thlang tlingin a um, 1994-2000 le 2000-2006 hai ah. June 19, 2017 khan BJP President Amit Shah chun India President inchu ding NDA candidate dingin a puong a nih.

India President thlangna ding a MLA pakhat vote hi a state population izir in an ang naw a, MP pakhat vote value ruok chu 708 a ni zing. Ram Nath Kovind hin 1,389 vote (A hlut dan 4,79,585) le Meira Kumar hin 576 vote (A hlut dan 2,04,594) hai an hmu a nih.

Official takin India President a 14 na chu zantieng dar 5 hin puong ding niin chanchin ei laksawngna chun a hril.