Fox Journal | CCPur: Churachandpur District sung a Henglep sub-division biel sung a chun natna hri hrietlo nasatakin an leng mek a. Zani chen a khan hi natna invawi mi tam tak el chu hi sub- division administration hmalaknain damnaw hai Sahktiman truck hmang a CCPur District Hospital hung phurtlung tawl an nih.
Hi natna hi sukchieng la ni naw sienkhawm Swine Flu ring a nih a. A zuolkai deu na khuo hai chu Henglep, Najang, Ainujang, Vongmol, Thinghizang, S. Khonom, Mollien le Khanpi hai an nih, damnaw hai hi motor a tlanlut vawng thei naw leiin puok dam an tul niin chanchin ei laksawngna chun a hril.
Henglep khuo a hi in a nasatak a, in 140 lai zet hi hri hi a them a, Nazang khuo a chu in 45 a them a, hi hri invawi 89 hai chu Nazang mi niin chanchin hriet a nih.
Hi report zieklut a ni chen ah natna invawi mo 139 hai chu District hospital tlung pui an ni tah a. Natna invawi mi dang tam tak, damdawi a enkawl tul vat vat hai khawm phurtlung vat an ni beisei a nih. An ni laia naupang pahni hai chu an inrik zuol niin hril a nih a, an hnawn a suok zing baka an inluok zing niin ei hriet.
CMO le District Hospital Superintendent hai chun thang nasatakin an lak a, Hospital pindan hai khawm hluo bit deu phur a ni tah. Zanikhan, mi 39 hai chu insuoktir an ni ta a, amiruokchu, an thisen test result la nghak a nih.
Volunteer pakhatin IFP kuoma a hrilnaa chun hi hri inleng enkawlna ding a tha tak ding chu thuneituhaiin a hmun a medical team tir a nih tiin a hril.
Health Minister L. Jayanta Kumar Singh chun damnaw hai chu Helicopter hmang a phur an ni ding a hril thu Hmasawnna Thar ah zieklang a ni bawk. (Pic. Courtesy: Dr. Jire L. Pudiate)
COMMENTS