Fox Journal | CCPur: Hmar Students' Association, CCPur JHQ in a biel sunga inchuklai pawl VI a inthawk pawl X chen hai ta dinga a buotsai Spelling Bee 2017 chu zani zan tarik 3rd July, 2017 khan LJ Memorial Hall (Life Cafe) Rengkai Road, CCPur ah nu le pa, mipui hlutsakna ditum tak leh ropui tak a zofel a lo ni tah.
Inruolsiekna tan a ni hmain hunser hmang a ni a, Pi Helen Lallienmawi Varte, CDPO - CCPur, ICDS chu Chief Guest in a thang a, Pu Jerusalem Infimate, Section Officer, PHED Guest of Honour in a thang bawk.
Khuoltha haiin inchuklai le student leaders hai ta ding a thu pawimaw le tha tak tak el an hril a. HSA CCPur JHQ in Spelling Bee 2017 a huoihawt chu lawmum an ti thu le inchuklai hai ta ding a thiltha hai a ni thu an hril a, thaw zawm pei dingin an hril a HSA thangpuina ding thilpek an inhlan ve ve bawk. . Khuoltha hai pahni hi JHQ chun Hmar puon bat le par-bâwr mawi tak el an inhlan.
Hunser hmangnaa hin Hmar hnam sunga mi pawimaw Upa Laldawnlien Varte, President - HYA GHQ, Pu Lalrobul Pudaite, Chairman - SCC HSA Manipur, Pu Lalvullien, President - HAA GHQ, Nk. Maragreth Tryte, Finance - HSA GHQ hai an thang tawl a. HYA GHQ, HSA SCC Chairman le President HAA GHQ haiin thuhriltawi an hmang.
Pu Laldawnlien in abikin HSA CCPur lai nasatakin a hming a lo sie tah a, mimal hamthatna beisei a hotu chel dam a lo nasa hlak a. Amiruokchu, HSA CCPur JHQ hmalakna thar tha tak tak hai ka lo hrietin lawmum ka ti takzet tiin a hril a. Pu Lalrobul Pudaite in Spelling Bee tobul hrilin, HSA CCPur JHQ hai thilthaw chu CCPur sunga student body um hai laia huoihawt hmasatak niin a hriet thu a hril a, hun a tawi leiin HSA dam zing ding a ditsakna inhlan in a suktawp a. Pu Lalvullien in Spelling thiem a pawimaw zie hrilin, tienlai le tulaia spelling harsatna a hril a, top 5 contestant hai chu thiem a ti thu hrilin ditsakna inhlan in a suktawp.
HSA CCPur JHQ Spelling Bee 2017 hi June 28, 2017, zantieng dar 3 khan Blue Room (Life Cafe) ah Elimination Round nei a lo ni tah a, mi 5 thlangdawk niin zani zan khan mi 5 a thiem filawr haiin a thiem tak inzawng nawk in Spelling 2017 Final Round hmang a nih.
Hi inruolsiekna tan a ni, a bula inthawk a Pronouncer a hmang chu Nk. Elizabeth Pachuau a ni a, ama thangpuitu dingin Judge pahni sie an ni bawk. Final a hin Round pathum General Round, Choose your Alphabeth Round le The Bee round - Contestant 5 hai hin an fethleng a nih. Hi taka mark an hmu hai po belkhawmin Champion le Runner up puong a nih.
HSA CCPur JHQ Spelling Bee 2017 Champion chu Master Mark L.F. Tlau s/o Albert Lalhmingsanga, Stephan High School, Saikawt a pawl 9 inchuklai a nih. A dawttu Runner up Master Lalsandam s/o Lalbarjohn, Mount Carmel School, Muolvaiphei a pawl 10 inchuklai a nih.
Top 3 changtu Jacob Malsawmdawnglien s/o Lalditum, Young Learners School, Rengkai Road a pawl kuo inchuklai, Top 4 ah Master Jacob Lalnundang s/o (L) Immanuel Lalrintluong, Young Learners School a pawl sawm inchuklai bawk a nih a, Top 5 ah Master Aloes Lalrosang Ralsun s/o Rev. Roparlien Ralsun, The Pathway School a pawl riet inchuklai mek hai an nih.
Champion Mark hin India pawisa 2000, Certificate le par-bâwr a dawng a, a dawttu hin India pawisa 1000, Certificate le par-bâwr a dawng bawk. Chun, top 5 a mi pathum hai hin India pawisa 500, 300, 200 - Certificate le Gift an dawng seng a. Participants hai po po Appreciation Certificate inhlan vawng an ni bawk. Hun kar lak ah hin Guest Artiste Nk. Christina Shakum, HSA Platinum Star le 1st Runner up Manipur Idol in hla mawi takin mipui fekhawm hai an awi.
Hi Spelling Bee 2017 hi Hornbill Cable Network in full coverage an thaw a, tuolsung cable TV ah en thei vat ni dingin ei beisei.
Images: Aurora Photography.
COMMENTS