Fox Journal | CCPur: HSA CCPur JHQ biel sung a mi HSA Hmarveng Unit chun an Unit - Hmarveng sung a inchuklai pawl sawmpahni le pawlsawm pass hai le inchuklai thaw tha zuol lawmpuina hunser an nei hlak chu zan liemtah tarik 17-07-17 dar 7:00pm khan Hmarveng Community Hall, CCPur ah hlawtling takin an lo hmang zo tah.
Hi hun a hin Nk. L. Margareth Traite, Fin. Secy, HSA GHQ chu Chief Guest in a thang a, HSA GHQ le HSA JHQ thuoitu haiin Felicitation programme a hin an thangve ve a nih.
Felicitation programme hi hun hawng tawngtaina Upa Ngurthangkhum in a nei zo in lawmlutna hun Tv. Buonthasang Vice-President HSA Hmarveng Unit in hun a hmang ve a, hi zo hin Nk. L. Margareth Chief Guest in inchuklai hai infuina thucha tha tak tak a hril, Carrier guidance Nk. Zokhumi, Education Secretary, HSA Hmarveng Unit chun inchuklai hai hmatieng peia an fe dan ding le ieng anga lekha thiem khawm a Pathien hriet tlat a pawimaw thu a hril.
Nk. Zokhumi, Education Secy. le Pu Lalngailien, Secretary, HSA Hmarveng Unit haiin Class x le Class XII hlawtlingna chang hai certificate inhlanna an nei nghal a, hi hun a hin chawimawina Certificate Nk. Margareth D. Sinate d/o Thangsuolien ,NEHU hnuoia B.Sc. (Botany Hons.) a 80.25% St. Anthony Shillong, Meghalaya hnuoia Topper/Gold Medalist a ni lawmpuina in chawimawina certificate inhlan sa bawk a nih.
Class X le XII hlawtlingna chang hai ta dingin Rev. John Siemlienin Pathien kuomah tawngtai pek na hun a hmang zo in Tv. Isaac Lalremruot, Persident HSA Hmarveng Unit in lawmthu hrilna hun a hmang a, Upa Laltlanlien in hun khar tawngtaina Pathien kuomah a nei zoin fak le dawn hning inhnar takin HSA Hmarveng Unit in fekhawm hai an hrai.
Hunser hmang karlak a hin malzai mawi em em in Miss Lawmsangzuali Hmarveng Idol 2016 le EFCI Saikawt Presbytery Project Vocal 2017 Winner in "Aw Lal Isu" ti hla in felicitation programme a thanghai an awi bawk a nih.
COMMENTS