Fox Journal | CCPur: Liemtah July 21 (Zirtawpni) le 24 zani khan HSA CCPur JHQ le HSA GHQ hmalaknain CCPur District sung a Hmar tawng hmang officer thar hai le CCPur DC thar an lawmpui.
July 21 khan Tv. Lalringum Pulamte, MPS, Asst. Commandant -1st IRB, Pi Grace Laihlizo, DTO le Pu Lalrochan Pangamte, Manager, Vijaya Bank CCPur hai chu an office a hai fe in lawmpuina in Hmar puonte inbat tirin lawmpuina le hmalak tlang dan ding hai an hriltlang pui.
July 24, zanikhan sunzawm nawk niin Pu Lalramsang Infimate, MCS, Addl. DC, Pu Shyam Lal Poonia, IAS, DC CCPur le Pu Rodik Hmar, Manager, Loktak Power Station (National Hydroelectric Power Corporation) hai chu Office le an chengna ina hai fein HSA thuoituhaiin lawmpuina hun an hmang nawk.
Officer thar hai hin hienga HSA in lawmpuina an thaw hi lawmum an ti hle a, HSA lo thuoi ve ta hlak dam an ni a, hnam ta ding a an theina um chun tiin inhawng takin lawmthu hril malamin an theinaa thangve pei dingin HSA thuoituhai kuoma an lo intlun. Lawmpuina hi an la zo naw a, an la sunzawm ding niin HSA hotuhai chun an hril.
Chun, HSA chun July thla sung hin sawrkar tienga inthawk a Electoral roll a lan ziek lut lo hai inziek lutna hun a hawng chun Special Drive thaw dingin an buotsai mek a, hi le inzawm hin HSA thuoituhaiin inhriettirna an la hung siem ding niin chanchin ei dawng.
COMMENTS