Fox Journal | CCPur: Tarik 3rd July, 2017 khan HYA Hmarkhawpui (Sipuikawn) nunghak le tlangval, nupui le papui hai chun HYA ram a mi thing phûr in a tam thei ang an inthawk dawk a. Hi thing an phûr hai hi mithi kuong dinga at dinga ti a nih.
Mithi kuong hi Hmarkhawpui (Sipuikawn) mi thina tuk hai le khaw dang mi khawsunga thina lo tuk an um pal chun chuong hai ta dinga tlawmngai taka mipui an in thawkdawk a nih.
Chun hi ni vek hin, tarik 28 June, 2017 zan a ruosur nasat leia Lungthulien le infepawna lampui hai chu hmun tam taka mimkei in a suksiet hai chu a hmun ngeia Village Authority (VA) haiin enfelin, lampui siemțhatna sin an thei ang tawk tawk in Hmarkhawpui (Sipuikawn) mipui hai chun hma an lak țan nghal a. An hma tieng motor chin bek lut thei dinga beisei niin ei chanchin lakna chun a hril a. Chun, hriet dana chun Hmarkhawpuia (Sipuikawn) hin Bufai harsatna leiin mipui an buoi mek bawk niin chanchin ei dawng.
Nidang khan chu bufai hi Mizoram tieng le Assam (Tuiruong ah) hai a inthawk in phur lut hlak a ni a. Tu ruok hin chu Mizoram tieng hlak ei ral ela (Tuivai ral) ah lampui nasatakin a chim leiin infepaw thei an naw a, chuong ang bawk chun Assam (Tuiruong ah) hlak tulai tuilien taluo leiin tui chunga inlawn hlak ți a la um bawk leh, mipui nasatakin an beidawng țan mek niin chanchin ei hriet.
Hi lei hin khawsung mi hai chun Manipur sawkar in an hma tieng, infepawna lampui hi siemțhatna sin thaw vat sienla an nuom takzet thu ei palai an hril.
COMMENTS