Fox Journal | CCPur: Chanchinthar ei hriet dan chun Linkin Park band a singer Chester Bennington chu ama le ama an khaihlum niin ei hriet. Security tienga hai thusuok hmu angin Chester hi Palos Verdes Estates, L.A. County hmuna ama private inah ama le ama inkhaihlum saa Ningani zingkar dar 9 (US Local time) hma met a hmu a ni thu an hril.
Hieng thil a tlung hun lai hin Chester ama khat chaua ina um a nih a, a sunghai chu town suoksan a fena an nei lai niin chanchin chun a hril.
Chester damdawi le zu thaw nasat leia hringnun harsa ti tak a hmangve a nih. Hun liemtah a khan ama le ama inkhaihlum a nuom thu dam a hril hlak a, asanchu, a naupang hun lai khan a neka upa pasal pakhatin a lo sawisak nasa lei niin a hril.
A thi ni hi Chester a ruoltha Soundgarden hai hlasaktu Chris Cornell a piengchampha a nih. Cornell khawm hi tukum May thla khan ama le ama inkhaihlum tho a nih.
Linkin Park hai hin hla hit tak tak an lo nei a, hrietlar em em Faint, In the End, Numb, Crawling ti hai bak ah Jay-Z le khawm nasatakin an inkawp a nih.
Chester Bennington hi a thi hin kum 41 mi a nih a, nuhmei pahni le nau paruk a maksan a nih.
Labels:
NewsSHARE:
COMMENTS