Fox Journal | Hmarkhawlien, August 31: Hmar tawnga kartin vawihni suok chanchinbu The Hmar Times chun kum khat hmel a hmuna hunser ‘First Anniversary Programme’ chu Area Office Training Hall, RPC Building, Hmarkhawlien-a zantieng dar 5 le dar 7 inkar khan hmang a ni a, First Anniversary Programme hmang haiin hunser hmangzo hnungin ruoi kiltlangna an nei.
Lawmna hunser inkhawm hi Tv. Joseph Darngawn; News Desk Editor in a keihruoi a. Editor Tv. Jacob Lalrawngbawl Amo in Keynote Address a hril.
Hmarkhawlien le a sevela inthawka fekhawm fiel bik hai hin The Hmar Times hmasawnna ding thu tha tak tak hrilna an nei a. Pu Abraham Keivom; President HNU Assam Region in hun hmangin Chanchinbu fetluong dan ding hrilna a nei a. Pu L. Thanmawia Pajamte; Vice-President, Hmar Inpui (Barak Region) khawmin hun a hmang ve a. Pu L. Pajamte hin Hmar tawng ngeia chanchinbu a suok thei hi lawmum a ti thu a hril bawk a nih.
Hunser hmangna huna hin Pu Fimronghet Hmar, Pu Joseph Pulamte, Pu JC Hmar le Pu Tlana haiin hun an hmang ve a. Rev Lalsuokhup, P/S in The Hmar Times buotsaituhai ta dinga tawngtaipekna le ruoi Pathien kuoma inhlanna a nei bawk.
Hmarkhawlien anthawk hin chanchinbu dang dang hieng Phaizawl Lily, Khawvel Thlirna, The Hmarkhawpui Post, Barak Post le Good Morning Bazar ti hai a lo suok ta hlak a nih. The Hmar Times hi August 31, 2016 khan Issue No. 1 a insuo tan niin a tlawna sem phawt a ni a. First Anniversary a suok chena hin Issue No. 104 a kaiphak ta a nih.
COMMENTS