Fox Journal || 23.08.2017:
Zani (Thawlenni) khan Manipuri Diaspora of Bengaluru keihruoina hnuoia Bengaluru sunga Tlangmihai chun Manipur Chief Minister Pu Biren Singh inhmupuina hun an nei. Hi inhmukhawmna a thupui chu 'Transforming Manipur, a New India' ti a ni a, a hmun chu Xavier's Hall, St. Joseph College a nih. Hi hun a hin Manipur sung chau ni loin Bengaluru sunga Tlangmi inchuklai tamtak el an fe khawma chuong hai lai chun HSA Bengaluru Branch member khawm țhahnem tawktak el an țhang ve.
Programme hi zantieng dar 5:30 khan țan a ni a, fe khawm mipuihai an hlim thlang hle. Hi programme a hin Pu Biren Singh-in thuhrilna hun a nei a, sienkhawm Bengaluru sunga Tlangmi Hnam dang dang hai ruok chun an pawl hming bikin thuhrilna hun an nei lem nawh. Sienkhawm hun tawp tieng deu a chun HSA Bengaluru Branch President Tv. Zolienkhum Joute le Bengaluru sunga Hmar lai a chu a kumhlun pawltak baka BHCF Asstt. Secretary ni lai zing Pu Jonathan Kungate hai chun Pu Biren Singh chu a Chief Minister tling lawmna le Bengaluru sunga Tlangmihai ngaituona leia programme a hung hmang hi chawimawi a phu zie inentirna dingin 'Thangsuopuon' an insiltir.
Programme hi tluong taka hmang hnungin hi huna fe khawm mipuihai chun thingpui dawn thlangna neiin zan dar 7:30 khan hi inhmukhawmna hi suktawp a lo ni tah!
COMMENTS