India rama MP upa tak ni hlak Pu Rishang Keishing muolliem

Fox Journal | Imphal: Chanchin hriet danin India rama Politician senior pawl le MP upa tak ni a hriet Pu Rishang Keishing chu kum 97 mi niin, nurse le doctor haiin theitawp an suo hnungin vawi zan dar 8:15 khan RIMS Hospital, Imphal ah a thuok a tawp tah niin chanchin ei dawng.

Pu Keishing hin Manipur kum 1980-1988 le Kum 1994-1997 inkar sung hai khan Manipur CM nina a lo chel a. Ama hi India rama MP upa tak ni a hriet a ni a, April 9, 2014 khan a MP term hi a lo tawp ta a nih.

A damsung hun a hin vawi iemani zat that tum tu an um a chu, an thel a, ama vengtu hai ruok chu a thi pha le hliem khawm an um a nih. Venghimna khawm tha tak pek a um a ni bawk.

MP a thlang tling a ni hmasatak tum, Parliament a pan in Cycle hmangin a fe a nih. A hun tawp tieng a la har deu laia BBC haiin an inpawlpui naa chun,"House inzana a um ta naw a, Speaker inza a ni ta bawk nawh. Modern Indian Parliament hi hun khawralna chau a ni tah" tiin Indian Parliament chungthu a hril.

Pu Keishing hin a dam lai khan muongna le hmasawnna hi a thiltum tak a nih a, hi thil hi mipui ieng hnam le hmun dang dang a um hai khawm a hmu ngei tum a thang nasatak a lak ding a ni thu a hril.

Hi chanchin a lo hriet le inzawmin Manipur CM ni lai mek Pu Biren Singh chun a Twitter account fethleng in Pu Rishang a sun thu le an pam thu a tweet nghal.

Pu Rishang a thi sunna in zinga hin Manipur state a sawrkar office le inchuknain hai khar ning a ta, State sawrkar in mithi hi nithum sung sunna nei a ni ding thu chanchin ei hriet bawk.