Fox Journal | CCPur: Kum 78 a upa, Singngat khaw mi chu CCPur District Hospital ah medical test thaw tum a fe chu hnawl a ni a, tir kir niin a test chu Private clinic ah a man let thum a sawrkar Hospital nek a insang lem a thaw tul in an siem niin chanchin ei hmu.
Suangin kum 78 mi, CCPur khawpuia inthawk a km 32 a inthawka Hospital a in check up ding a hung a nih. Ama hi Doctor chun Rante Blood Sugar (RBS) le Kidney Function Test (KFT) chu kar liemtah Inrinni khan CCPur district hospital ah thaw dingin a hril a. Test thaw dinga a va fe chun, bio-chemistry department hai chun Thawtanni a hung nawk lem dingin an lo hril leiin a naunu ina khawsa in a nghak a, Thawtanni a va fe chun a zinga hung dingin mak ti takin an lo sawisak a nih.
Damnaw chau tak el a ni tak leiin a nghak char char thei ta naw a, District Hospital Superintendent a pan tah a. Superintendent chun department technicians hai chu a damnaw khawm a chau ta leiin test lo thaw dingin a hril a nih.
Amiruokchu, bio-chemistry department a technician chu damnaw chunga chun a lung a sen ta deu deu a, Superintendent direct-a a van hmupui lei chun test chu an thaw pek naw reng reng ding thu a lo hril ta lem a nih.
Suangin a makpa le a ruolhai, local press thenkhat hai thangsain hi thil hi Medical Superintendent kuomah an intlun a, test thaw dinga a hril pek a staff hai ngeiin a tawng an ngai naw chu a lawm naw hle a, hi chungthu a hma a lak ding thu a lo hril niin chanchin ei hmu.
A zinga chun local press haiin thu kan chieng dingin an va fe nawk a, New Lamka khuo a mi pakhat khawma a blood test thaw chu bio-chemistry department haiin an suk riral mei mei niin a hril.
Hi Department in-charge Dr. Prem chu a kai ngai naw hle a, a hun tam lem chu leave/châwl in a hmang ti suklang a hung ni bawk a nih.
Hieng ang thil ditum lo tak hi mi dang dang a inthawk khawm bio-chemistry department hai hi complaint a tam hle niin chanchin ei laksawng na chun a hril.
COMMENTS