-V L Renga Hriler
Nikhat lai khan India rama sin lâkna tienga Commission pawimaw pâwltak office ah ka sin le zinawmin meeting kan neia, meeting kan zo hnung chun chutaka posting mêk officer pakhat leh a room ah thingpui kan dâwn a, ram tin kan hohlimna a chun, thu ngâipawimaw um deu el a hung phawr lang a.
Chu taka kan hohlimna chu hrilsuokna ding platform ţhatak a um naw leiin hi lai hmun hi ka hung hmang anih.
India ram a competitive exam (UPSC le SSC) result hai hi chîktakin ei lo thlir hlak am? Chîktaka lo thlir hlakhai chun, ST quota hi Meena hnam in 70% to 80% vel an hũi (capture) hlak ti hmu ngêi ei tih.
Hi thil hi zuk ngâizam el awl tak, amiruok chu, chîk taka sũt chun andik hlel deuam ti thei dingin a um anih. An leh Meena hnamhai chu tuham an nia? ST an ni chie am?
Meenahai hi 2001 Census dungzui chun 3.8 million an nia, 90% deu thaw Rajasthan state ah an uma, a ţhen Madhya Pradesh, UP le Haryana ah hai khawm hmu ding an um. Anni hi Vedic hun laia ruling tribe lo ni phak le Rajput lalram pieng hmaa Rajasthan lai, lal ram lo indin thei annih.
British hun lai khawm khan Meenahai ta ding sipai Deoli Regiment a siema, sienkhawm, an hel pei leiin Criminal Tribes in a lo puong anih. Thudik ani am ti proof umnaw sien khawm an hril dan chun India Scheduled Tribe list an siem lai khan, Bhil tribal (Rajasthan) laia chêng ve Meena hnamhai chu Meena danghai nêkin an mawla.
Bhil tribalhai ang thova an inhnuoi leiin Bhil Meena tia tribe a ziek lut dinga ti ania, anachu, a type tuhai khan Bhil le Meena inkara COMMA (Bhil, Meena) an lo si pal leiin Bhil tribe area a Meena chau ST ah zieklut ni ta lovin Meena hnam Rajasthan a um phawt ST a ziek lũt an hung ni ta lem anih tiin an hril.
Hnam changkâng tasa an ni leiin ST quota hmangin tuhin Central Govt IAS, IPS, MP (ST Quota), Rajasthan Govt ah hai an lũt zung zung a, sorkar rorelna khâwl pawimawi tak tak an chel leiin thu an nei em em a nih. An lêkha thiem lei khawm ani zingin an population tam lei le an piengpui ţawng, Hindi medium a lêkha inchuk; Hindi medium a exam hlak an ni lei khawm anih.
Meena hnamin ST hamţhatna an hmu lei tak tak hin, hnam insang lemha’n SC/ST hai hi an hmupeinaw pha anih ti pawl khawm an um mêk anih. Sorkarin ST hai ta dinga hamţhatna a siem hi, hnam pakhat chauin a hui ţeu ţeu hi an diknaw a nih.
Hienga a fe pei chun, sawtnawte hnungah ST quota hi hũi (capture) vawng thei ngirhmunah an la hung ngir vat ring a um.
Ei sang, ei nauhai hmakhuo ngâina leiin ST danghai hi ei ţhanghar a hun ta takzet. Chu ding chun, ei ni Hmar hnam (HSA) chu tlawmte chau ei nia, ST hnam dang danghai le ţhangkhâwma hma ei lâk hi a hun ta takzet anih.
Tuhin statistics indik tak nei naw inla khawm a thaw dan awlsam tak chu Parliament ah MP pakhatin Central Service recruitment ah hin kum 5/10 liemta sunga ST quota result/appointment tribe wise data Unstarred questions hmangin hni sienla, chu chu data chu sorkar recruitment agency han an hung peklut dungzuiin Meena ha’n iengza percent am an hũi (capture) ti hriet thei nîng a ta.
Chu dungzui chun, ST dangha’n thiemtaka an nawr chun Meena hnam hi ST an thawk an sie suok annaw leh reservation within reservation for other tribes or fixed percent for Meena ti khawma an suk danglam thei beisei a um. Hi dinghin a platform ţha deu hieng organisation lien deu hriehaiin hma hung lahai sien ţha ngawt naw ni.
NB: (1) Hi issue hi kei khawm competitive ka exam ve laia kha ka lo ngâimâw ve êm êm hlak anih.
(2) A mi hohlimpui tu Officer hin a hming tarlang lo dinga ami ngên angin ei tarlang nawa, chuong ang bawkin, hma la tu ei lo um ani khawma, sorkar sinthaw ka nina zarin, lunginsiettakin ka hming suk lang lo hram dingin ka hung ngên anih
COMMENTS