Imphal Hmar Sports 2017 tumtiek; NGV Area in hrâtna nopui an dawm

Reports & Photo: Lalbelsang Infimate, Correspondent, Fox Journal

Fox Journal | Imphal: Tarik 28 a ṭan a lo um tah Imphal Hmar Sports 2017 chu Inrinni khan a lo tumtiek tah.

Imphal Hmar Sports 2017 khârna hunser hi Pu Lalrobul Fimate, MCS chu Chief Guest a ṭhang in hi hunser hi a uop a, Pu Dr. John Pulamte, Member, Manipur State Commission for ST le Pu C Ṭhuoilien, Adviser, HSA Imphal JHQ hai chu special invitees a ṭhang in an uop bawk.

Sports khârna hunser hmang hma hin Football Semi Final match hni inkhel a ni a, chu taka chun NGV in Checkon, DM Unit in MU inchûklai hai hnebân in NGV le DM Unit chu final an lût a nih.

Final inkhêl hma hin sports khârna hun hmang a ni a, hunser hi Tv. Lallianmawia, Asst. Secretary HSA Imphal JHQ in a keihruoi a, khuollien haia inthawk thuhril tawi ngaithlâk a ni a, Upa Lalṭhalien Khuongpui in ṭawngṭaina nei a ni bawk.

Final match HSA DM College Unit le NGV Area haiin an khel a, hrât bîk um thei lo in match hun chu a bo leiin penalty pêt a ni a, vangduoi thlâk takin HSA DM Unit hai chu hrât zo ta loin NGV haiin hrâtna nopui an lo dawm ta a nih.

A huoihawt tu HSA Imphal JHQ hai chun Organising Committee hai lei Media Partner hai chungah lâwmthu an hril.

Hi Sports lawmman hai hi vawisun tarik 2 a HSA Imphal JHQ Freshers Meet hmang a ni hun ah inhlân a ni ding ti thu dawng a ni a, mitin in hi hun hi hung uop dingin HSA Imphal JHQ ṭhuoitu haiin fielna an siem nghal.