Upa Hrangzakhum kum 100 tlingna lawm a nih

Fox Journal | CCPur: Upa Hrangzakhum f/o Pu Laltlangmawi Inbuon, Sielmat chu vawisun tarik 28 December, 2017 khan an chengna in Canaan Veng, Sielmat, CCPur ah a kum 100 tling lawmna hunser ropui taka hmang a nih.

Hunser hmangnaa hin a naupa, a umpui tu Pu Laltlangmawi Inbuon in a pa chanchin hrilna hunser a hmang a, Upa Hrangzakhum ta ding a tawngtaipekna Rev. Maylawmthang Tuolor in a hmang ve.

Pathien thucha hrilna hun Rev. Lalnghaksang in a hmang a, hi baka hin lawmpuina thuhril tawi mi dang dang a inthawk ngaithlak niin hlasakthiem ei hrietlar tak tak el Nk. Deborah Infimate, Nk. Gloria Khawlhring, Nk. Cindy Lalruotmawi le Pi Jenneth L. Varte haiin inpakna hla mawi tak tak el an sak.

Upa Hrangzakhum kum 100 tling lawmna hunser a hin mipui fekhawm an thahnem a, lawmpuina thu le thilpek tam tak el a dawng. Hi lawmnaa ding hin bawng pumkhat le vawk a ruoi buotsai a nih. Hunser hmangzo a niin lawmpuitu fekhawm haiin kum 100 lawmna ruoi hlim takin an kiltlang.

Upa Hrangzakhum hi kum 1917 khan Parbung, Pherzawl District ah a pieng a. Nuhmei Saituokim neiin nau 14 an nei a, tû 61 nei a ni tah. An unau hi 10 niin tuhin ama le a sangnu chau a dam an um an tah.

(Image: Aurora Photography)