Fox Journal | Muolhoi || Vawisun 13.03.18 Hmar Inpui Office ah Village Goan Bura le Organisation HYA, HPU, HSA, HWA hai fe khawmin Hmar Inpui NC Hills & Karbi Anglong huoihawtna in General Meeting nei a nih.
First Session:
Ministry of Minority Affairs hnuoia hunsawttak Hmar Inpui hmalâkna hai chu Pu H.L Sanga Neingaite, President Muolhoi Village in palai fekhaw hai kuoma hrilhrietna a nei a meeting ko nasan hai hrilin Hmar khuo 26 lai vel chun Development Scheme chi hrang hrang Additional Class Room (ACR), Hostel, Toilet, Water Tank le Medical Sub centre hai chu anlo hmu ta thu hai hrilin sin hai chu ṭan el ta dingin work order hai khawm kei dawk a ni ta thu hai a hril bawk.
Official thil a bawzui tu pawl dinga N.C Hills sunga Inpui tinin mawphurna NCHISF hai kuoma 2013 kum lai dei a an lo pek anga ringum taka an bawzui na leiin a puitling thei a ni thu hai hrilin Pu Rosang Hrangchal, President Hmar Inpui N.C Hills & Karbi Anglong Region chun lawmthu a hrila. Chun, Hmar khuo sûnga lût po hi crores iemani zat zet a ni phâk a hieng ang hi Council an'thawk khawmin ei la hmu ngainaw leiin Scheme lût na khaw tin Goan Bura hai sinthawtu hai kawng iengkim a ṭhatak a hma lo la pui dingin a fiel a. Chun, fekhawm Goan Bura tin le Organisation dang dang HPU, HWA, HYA le HSA hai chun thataka sin hai sawrkar in a mi pek ang taka sinthaw a ni thei ngei na dingin hril tlângna nei a ni a chun tukhawma a kal zawng le a chawkbuoi zawnga hma lo la lo dinga hril a ni bawk. Khaw tin GBs hai chun Hmar Inpui in an ring phak lo an khawsunga development an hung thun hi mak an tiin an lawm hle thu hai hrilin Hnam Pa an ni zie an suk chieng hle thu tawp lo in an hril tawl bawk a nih.
Chun, Pu Nicholas Thiek, General Secretary Hmar Inpui chun fekhawm hai kuoma chun khaw tin a schemes a lut dan hai hrilhrietin tuta schemes dang dang hmu a um hai hin ei tul po po lo phuhruk hne naw sienkhawm hmatienga schemes la hung um pei dinga hin Inpui chun theitawp an hung suo pei ding thu hai a hril a. Chun, proposal hrim hrim Inpui in ṭul le ṭha a ti anga Hmar hnam sunga mi hai a lo pek ta hlak ang bawk in next proposal 15 Crores lai zet pêk nawk dinga um khawm hi Inpui hnuoia felfai taka pêk a ni theina dingin khaw tin a GBs hai chun an khuo senga a mamaw zuol bik hai chu an pawimaw izira list in siema hung submit dinga hril an ni bawk.
Hi huna hin NCHISF President Tv. David keivom khawm fiel a ni angin thuhril tawi a neina a chun ''Hmar Inpui in kawng iengkim a in mi thlawpna leiin lawmthu ka hril a, a bul ei ṭan lai mi tamtak nuisaw ni inla khawm in mi ringzo na leiin hi chen hi Pathien in a mi ṭhuoia, tuta hi eiin ṭanna a ni a, hmatieng khawm nasataka ei ram development na dingin hma ei theina senga organization dang dang hai thang tlang in Hma ei lâk tlâng a ṭul takzet a nih,'' tiin Scheme chungchang a hrilfiena tawite a nei.
Second Session:
Lt. General Pu SB Negi chun Chawimawina thilpêk Pu Lalhruoi Hmar, Muolhoi chu a pek nuom leiin 15th March hin Muolhoi community Hall a ngei programme an hung siem na thu a Hnama Organisation hai kim taka ṭhang seng dingin Hnam Inpui chun a fiel. Hi huna hin DC, SP le Army tienga an hotulien hai tamtawk tak hung dinga beisei an nih. Pu Lalhruoi Hmar hi PoW (Prisoner of War) 1971 Pakistan le India indo lai a Pakistan jail a kumkhat le ni sawm pariet (1year and 18days) lai zet lo intang a nih. Chun, a ma hi N.C Hills a POW a dam la umsun a ni bawk, ei hmar hnama khawm hienga India ta dinga Pakistan jail lo intâng hi chu vâng hle dinga ring a nih. Program hi phuisui taka hmang dinga lo in puocha a ni thu ei thulakna chun a hrilsa.
COMMENTS