Hmun tum tum ah tumkau ni hmang

Imphal

Sielmat

Lamphel ah Hmar Kohran Naupang Sunday School Inzawmkhâwm in Palm Sunday lam hraw na an nei.

Fox Journal, Imphal | 25.03.2018: Ei suol hai sandam dinga ei Lalpa Pathien in a naupa a hung pêk Isu Krista khawvêl a aum laia chawimawia a um ni Palm Sunday kum tin a inser hlak angin vawisûn Palm Sunday ni le inzawmin vawitûk inhmatak khan Lamphel, Imphal (Imphal West Dist. Hq.) hmun a Hmar  kohran um hai a Naupang Sunday School Inzawmkhâwm in vawitûk khan Lamphel khuo sûng ei Lalpa Pathien chawimawinain lam an hraw.

Hi lam hraw na hi Lamphel EFCI Biekin hmun a inthawk zîng dâr 4 khan Pu Darremlien in Pathien kuomah ṭawngṭaina neiin suok dawk ani. Lamphel khawsûng fang sûng hin Nunghak le Tlangval ṭhenkhat hai inrawina in Lalpa hminga hung chu a ham a ṭha, ram hung tlung ding ei pa Davida ram chu a ham a ṭha, chunghnung tak a hin tiin ṭawng pathum Hmar, Sâp le Meitei ṭawng a khêk in ei Lalpa chawimawina an nei.

Lamphel ICI Biekin a lût in program hmang ani a, Rev Manga, Circle Pastor, Local Church in lâwmlûtna le lâwmthu hrilna ṭawngṭaina a nei a, Pastor Lalbuotsai, Circle Pastor ICI in Pathien thucha hrilna a nei. Naupang ṭhuoitu haiin hung an hmang na ah chun kum dang anga thaw nâwk thei a um hi lâwmum an ti a, kum dang nêka hma sawn in nu le pa ṭhalai tamtak in an hung uop hi ropui an tiin lâwmum an ti hle thu an hril.

Program hmang zo a ni hin thingpui le bei inhnik tâwktak kil tlângin mani inlum seng pan dingin inṭhe dar ani.

Vawitûk a lamhraw na nei a um a hin mipui 100 nêka tam an fe khâwm a ni tiin report chun a hril. (Report & Photo: Fox Journal Correspondents, Imphal)

Chun, hieng ang bawk hin Sielmat khawsunga EFCI le ICI Naupang department pahni hai inkawpin Hossana tiin khawsung an fang a. Hieng baka hin hmun tum tum le khaw tum tum a hai khawm tumkau ni hi tha taka inser a ni thu ei dawng a. Parvachawm khuo a khawm kohran EAC, ICI, EFCI le RPC a Naupang department hai kum dang ang bawka inzawmkhawmin tumkau ni inser ve a ni a. Mi 4000 bawr vel fekhawmin Isu Krista chawimawinain khawsung fang a ni bawk.

Chieng taka ei hriet, inkawpa thaw hai chau report ei hung suklang a nih.