Fox Journal | Haflong: Vawisun 01.03.18 khan DC Conference Hall, Haflong ah Shri. Devojyoti Hazarika Deputy Commissioner chair na hnuoiah meeting nei a ni a, hi huna hin mi pawimaw Shri. Pallav Bhattacharyya DGP (SB) Assam, Shri. Pramood Jain DRM NF Railway, Shri. R.P Jingaar NF Railway Chief Engineer Maligaon, Shri. Gagan Pandey CO 43 Assam Rifle, Shri. Prasanta Saikia SP Haflong, Council Revenue Officer le Railway deptt. an'thawk mi pawimaw tamtak hai bâka NCHISF an'thawk palai mi tamtawktak an ṭhang.
Hieng a hnuoia ang hin thuthlûkna an siem:
1. Land Development cost chungthu a hunsawttak hriltlangna an nei hnungin Railway Authority hai hi thlakhat hun pêk nawk an ni a, hi hun sung hin Compensation a ram neitu hai in an hmu naw chun 1st April an'thawk Rail blockade chu NCHISF in huoihawt a tih.
2. NCHISF ngênna ang in DRM chun Haflong, Mahur le Harangajao hmuna Reservation Ticket counter chu khawpui lai hawng dingin antiema, hmangruo a ṭul iengkim a ṭul angin an ngaituo ding thu a hril.
3. DRM bawk in Hills Queen express nikum Nov. 2017 a tlân hman ta dinga hrila lo um ta kha zofel a la ni naw leiin hung tlung ding April thla an'thawk hin Lumding chu Silchar intlân tir a Double line zofel hnunga New Haflong - Guwahati intlân tir ning a tih.
4. NCHISF in Passanger Train hrim hrima tlângmi hai ta ding bikin Rail Coach pakhat bêk reserve nisien ti a ngênna chu Silchar an'thawk Guwahati Fast Passenger Express a Coach pakhat reserved ning a ta, Train dang ruok chu a hnunga lan biek nawk dingin an sie.
5. Railway Deptt. a IV Grade sin abikin Local tlângmi hai ta ding a reserved dinga an ngênna chu DRM hin ka thu neina, sin thu a hin um naw sienkhawm ka theitawp in Local mi hai ta dingin hmâ lâng ka tih a ti bawk.
6. Silchar le Dibrugharg in kar a Train pakhat bêk intlântir dinga a ngênna chu hi thu hi bawzui mêk lai a na, hun sawtnawte hnunga a tlân ta ding thu DRM hin a hril bawk.
7. NCHISF ngênna angin Harangajao Old station khawm thu nawk um hma poa dingin School le ṭul an ti anga hmang dingin DRM hin a phal pêk bawk.
Hun tawpna a Tv. David Keivom, President NCHISF, chun fekhawm hai kuoma lawmthu hrilna neiin abikin DRM kuoma Foot over bridge Mahur le Dittokchhera a pêk bâka Mahur le Harangajao Station approach road NCHISF ngênna sukpuitling a siem mêk a nina le inzawmin NCHISF hmingin lawmthu a hril bawk.
COMMENTS