Jerusalem chungchanga Donald Trump Thupuong le a kakhawk thei ding awm

Ziektu: Rev. Dr. Lalrosiem Songate

US President Donald Trump in December 6 2017 nia Israel ram capital dinga Jerusalem a hrietpui thu a puong khan khawvel a chawk hning chau khawm nilovin, sawisel a dawng nasa hle! Khawvel a nghawng dan le Bible hrillawkna le an zawm dan ding awm tihai ei hril hma hin ama Donald Trump chungchang thu hi hang en phawt ei tih.

Donald Trump hi politician nilo, sumdawng mi hausa tak el a nih. Sumdawngna kawnga politician hai le inkhak met met hlak, Obama le ngei khawm policy thua lo inkhak tah an nih. A mizie a, mi hausa a ni bawk leiin mi uongthuong ang reng, ti zapa khawm nei bek loa a hma tawk tawk hrilmi a ni leiin politician hai thin khei zawng khawm a hril rawp hlak chu a ni awm. Chun, nuhmei mi tak khawm a na, tuta a nau ruol vang nuhmei a nei dan a khawm hin an hriet thei. Nuhmei chungchang thu a, uongthuong deua, “Nuhmeihai chu an phek ah ei țhama, a nel annawm..” ti a a hril lai video an hung sukdar lem khan chu an candidate lai a ni bawka vote tum tu tamtakin an tlan san nghe nghe a ni kha.

Chun, eini laia thuhriltu țhenkhatin Donald Trump hi Pathien mi deu anga an hril ka hriet rawp hlaka, hi hi thu indiklo a nih. A sakhuo zawnga chu sakhuo dang a zui naw leiin Kristien chu a ni ngei, amiruokchu, sacrament semna thlêng le thawlawm dawlna thlêng tak ngiel khawm hre hranlo a nina hin a thlarau ngirhmun khawm iemani tawk chu hriet thei ning a tih. US President inthlangna a Evangelical Kristien hai le Conservative pawl haiin an support nasan khawm hi ama hi a Pathien mi a, ti thu niloin Democratic party le Obama liberal policy Hilary Clinton in a hung bawzui zawm pei ding an ditnaw em leiin a vawrthlakna ding ti a an thlawp lem ni takin an lang.

President Donald Trump hin a vote zawng lai khan thutiem iemanizat a nei a, Juda mi le Kristien hai vote ditna leia tuta a thilthaw khawm hi a lo intiem ta sa a nih. Hi thu a puong hi thilmak dangdai tak khawm an chuong nawh. America sawrkar hin hun sawt taka inthawka kha Jerusalem hi Isarel ram Capital a an lo pawmpui ta hrim hrim a ni a. President hmasa hai chun a political kakhawk inlauna leiin an lo puong lang kher kher ngai nawa, tuhin Donald Trump hin a hung puong suok ta chau lem a nih. Amiruokchu, a danglamna chu hienga a puong suok ta si chun US Embassy chu Tel Aviv a inthawkin Jerusalem ah a sawn a ngai ding a na, chu ruok chu thla ruk hnunga bawzui chau dingin an hril nawk bawk a. Chuleiin ramdang hai sawiselna tuok sienkhawm Embassy sawn tak kha an thaw nghalnaw ding leiin a sawisel tuhai khawma zuk thaw rak dan khawm a um chuong nawh.

Eini lai chu Donald Trump thupuong ei hriet le inruolin Jerusalem tempul tungding nawkna le khawvel tawp hun leh ei zuk ngaizawm nuom nghala, ngaizawm thei khawm a ni tho bawka a nih. Jerusalem hi 70 AD laia Rom sawrkarin a suksiet a Juda mi po po khawm an tlandar vawnga, Jerusalem tempul khawm suksiet vawng a na, Isun a hrillawkna a lem chun tempul a siet hne ding ziet chu a lung inthuo pakhat khawm umlo dinga a ti a nih. Tulaia JCB hmanga inhlui an rawt ram vawng hai ang ding a ni awm!

Chu hnunga Muslim rallienin a hung laka kum tamtak an hung awpde a, chu hnunga British hai kuta kum tamtak a um a. 1948 khan British sawrkarin a suoksan ta ding leiin Juda hai le Israel hai ram a țhe pek a, Jerusalem khawm tlak tieng pang Judahai in an changa, suotieng panga Arab haiin an changa. British haiin an suoksan chara Israel ram Juda mi tlawmte chau umhai chu nuoi chimit nghala an ram lak pek vawng dingin a kawl vela Arab ramhai chu an insingsa zing bawka. Anachu, Pathien thu ruot umsa a ni leiin an hne chuong nawh.

1966 kum khan Six Days War indona a um nawka chu țum lem chun Israel ram lakpek ta nekin Israelin Jerusalem khawpui suotieng pang Arab hai chan chu an lak pek lem ta dai a nih!  Nikhat lai khan kum tamtak Israel rama missionary sin lo thaw ka ruolpa tuta Germany rama um ta pa leh kan hohlima. Ama'n a hril dan chun Israel ram hi middle-east rambung hai laia democratic ram umsun a na, a ram sunga hin ieng sakhuo khawm zalen takin an um thei vawng a nih ti thu a hril a. A hril peina a chun 1966 kuma Six Days War khan Jerusalem hi Israelin lo la vawng ta sienkhawm an sawrkar sakhuo zalenna dan chun Muslim hai biekin Dome of the Rock an ti khu a um an phal baka, zalen taka an sakhuo an zui khawm an phal bawk a nih.

Hi thua an buoinaw nasan pakhat dang chu tulaia Judahai le Israel sawrkar ngaidan le a mimir tamlem ngaidan chun sakhuo tienga inchukna ding synagogue hai an nei bawk leiin an tempul indin thara tienlai inthawi danhai kha a țulna an hriet hran naw a nih. Chun Solomon tempul hmun thua khan ngaidan chi hni a um bawka, chuonghai chu tuta Dome of the Rock an bawlna hmun a nih ti pawl leh annawh ti pawl an um bawk a nih. Amiruokchu, Judahai laia sakhuona tienga kulmut pawl Hasidic group an tihai ruok chun tienlai Mosie dana inthawina hai kha sunzawm nawk an nuoma, chu ding chun Jerusalema tempul bawl an nuoma a hmun khawm tuta Muslim hai hmun pawimaw Dome of the Rock umna kha niin an hril bawk a nih. Anni dit dan Israel sawrkarin an phur suok ding chun an Constitutiona sakhuo zalenna dan an țhiek ngai a ta, Judaism hi a state sakhuo dinga an puong ngai bawk a ta. Chun, Arab hai le in tuol vuoka, nuoi chimit vawnga an biekin Dome of the Rock khu țhiek dar vawnga, tempul thar indin a ngai bawk ding a nih. Tuta Israel Constitution le an sawrkar policy fe dan en ruok chun chuong ang chu a ni hmel naw bawk si.

A ni hmel nawh ti leia khawvel tawp vaklo ding anga ngai ding khawm a ni chuong nawh. Zawlnei Daniel bung 9 na a Daniel hapta 70 kha ei en chun hrilfie dan tlangpui chun Nehemia rawia Jerusalem indin thar nawkna BC 441 vela inthawka tiemin Isu Krista (Messiah) sukhluma a umna chen kha hapta 69 a ni a. A kar laka tuta lunginsietna hun ei ti kohran hun hi a tla zepa, a hapta 70 na chu rapture zoa Tribulation hun ding hi niin an langa. Chu chungchang thu a hrilna Daniel 9:27 ah mi tamtak leh karkhat sunga dingin thuthlung siem a ta (karkhat chu kum 7 tina a nih), a kar chanve a chun inthawina hai hung khap tang a tih, tiin a hril a. Inthawina khap ti hin Judahai Pathien biek a khap ding tina a nih. Hi taka a hril hi antichrist chungchang thu a nih.

Chu thu bawk chu Thupuongsuo 13 tieng ei hmu nawk a. Thupuongsuo bung 13 a hin sahrang pahni ei hmu a. Pakhat chu tuipuia inthawka sahrang a na (13:1-10), a pahnina chu hnuoia inthawka sahrang a nih (13:11-18). Tuipui chun Jentel mipui hnamtin chitin an entir a, chu umzie chu sahrang pakhatna hi Jentel hnam laia inthawka hung suok ding tina a nih. Sahrang pahnina chu hnuoi (land) a inthawka hung suok ding tina ana, hi taka hnuoi (land) ti hi Judahai ram Palestine in entirna a ngai a ni a, chu umzie chu sahrang pahnina hi Israel hnamhai laia mi a ni ding tina a nih. Commentary khawm annaw a, a tawi zawngin hang hril el inla: sahrang hmasa hi antichrist ning a ta, sahrang pahnina hi zawlnei tehlem ning a ta, Juda hnam laia mi a ni leiin ama hmangin Israel mi tam tak antichrist hlem bawlin an um ding a nih.

Chuongchun antichrist chun hlembawlna le inchalremna dan hmangin kum thum le a chanve sungin nasa takin hung insuk det tang a ta. A vawikhat insukdet zo pha ama kha Pathienah hung insal tang a ta, Pathien dang hrim hrim do a ta, inthawina hai le pathien dang biek hrim hrim a hung khap ta ding a nih. Hi hin Judahai khawm an inthawina kha a khap ding tina a na, chu umzie chu hi hma hin an tempul khawm an lo bawl zo ta a, inthawina hai khawm an lo sunzawm nawk tah ti a suk langa, anachu, iengtika bawla iengtika inthawina țan am ti ruok chu iengkhawm hrilna ei hmu nawh.

Țhenkhat chun Israel chu tempul bawl thar dingin anpei zing, hmangruohai khawm an lak khawm zo vawng tah ti anga hril pawl ei um hlak. Tu hri hin chu Israel sawrkar lungril le policy a khawm a la umnaw a, Juda kulmut Hasidic hai lai chaua ngaidan um a ni lem niin an lang. Hi tempul indin thara um ding hi rapture hma a tlung ding tina a um naw a, rapture hnunga tlung ding khawm a hawi lem hman hman. A san chu, rapture hung tlung a ta, khawvel namenin buoi nawnia, chu chu remchanga lain antichrist hung ngir suok a ta, sawrkar tin thuthlung siempui a ta, Israel hai le inremna siemin tempul khawm a hung indin pek ding a ni el thei. Chuong a ni ding chun rapture, mithienghlim lawr ei ti hi a hung tlung hmasa zet ding ning a ta. Chu chu ei kohranhai thuring laia The Imminency of the Rapture, (rapture iengtik lai khawma tlung thei zing an tah) ti hi an dik hmel ta hle a nih.

Donald Trump thupuong a khan hang kir nawk ta in la. Jerusalem khawpui Israel hai capital dinga US sawrkarin a hrietpui thu a puong bak ah US embassy khawm Jerusalema an hung sawn ngei ding a na. Tuhin Jerusalem pumpui hi Israel kuta um an ta bak ah tulai khawvela Muslim helna sosang em em leiin a kakhawk ieng bek chu a ni naw el thei bawk. US Embassy sawn leia khawvel indopuina suk suok khawpa buoina a hung suok chun leh thudang ning a ta, ring chu a um bek naw a nih.

Iengpo khawm nisien ringtuhai ta ding chun khawvel boruok inlumlet dan hai le thil umdanhai enin hun nuhnung tienga um chu ei ni tah ti a chienga. Rapture khawm iengtik lai khawma tlung thei zing tah a ni bawk leiin ei Pathien tuok dinga inpei zing ding chu ei nih. 

“Tulai thil umzie in hriet lei le, inhai ta dingin inna a inthawkin țhanghar a hun ta takzet ti in hriet leiin chu chu ka hril a nih; tuhin chu ei awi phut lai nek khan chu ei sandamna chu a hnai lem ta sih a.” (Rom 13:11).


COMMENTS

Name

Articles,95,B Lalsanglien,1,Bakshi,1,BUONGLIENKUNG,11,Cleaven Hmar,1,DIAMOND MALSAWMTHANG TUSING,1,Dorothy Hmar,2,DR ROCHUNGA PUDAITE,1,EDWARD TC HRANGATE,1,Elson J Thiek,1,Fox Journal,2,Fox Journal thuziek,2,Fred Lalramsan Khawbung,1,GB Niropui,1,Guwahati,2,H ZATE,2,Hal Ziek,1,Hla Ziek,145,Hmangaina Hla,11,Hmar,12,Hmar articles,9,hmar culture warriors,1,Hmar hla,2,Hmara,1,Hnam Hla,16,HP RUNREMTHANG,6,HRANGLIEN SONGATE,1,I-League,1,Inruoksiekna,1,JAMES SONGROLAL,2,Joshua L Thiek,12,Jr Amo,5,KAMA SUNGTE,2,L KEIVOM,7,Laldena,4,LALHMINGTHANG,2,LALHMUNSANG CHANGSAN,1,LALKHUM KEIVOM,1,LALNGHATLIEN SONGATE,1,LALRAMLIEN KUNGATE,1,LALSANGAWI,2,LALTLANSUNG MIHRIEMATE,1,local,2,Local New,1,Local News,498,LR NGHINGLO,1,LT. NEITHANG,1,Manipur,1,National News,29,News,567,Nursing,1,PASTOR KHUONGA,1,PASTOR LIENRÛM,3,PASTOR V.T KAPPU,8,Pathien Hla,105,Paulsiemlien,1,PAUTINKHUP,1,PI ROSIEM,1,PI RUNCHAWNG,1,Poem,1,REV THANGNGÛR,13,REV. T KHUMA,1,REV.NGAMLALCHAWL,1,Rimawi,11,Robinson Zote,1,Royal Global University,1,ROYE,1,Season 1,1,SEMA FAIHRIEM,2,Sielmat,1,SONGLIENTHUOM,1,Sports,11,SUMA,1,Thanglienthuom,1,THANGLIENZO,1,THANGZARLIEN,2,Thuziek,1,TRAU,1,Tribute,1,UPA DANGVEL,1,UPA L.MUONVEL,1,UPA LALNUNTLUONG FAIHENG,1,UPA LIENSUN,1,UPA LIENTLUNGVEL,1,UPA NGAMA,5,V L LAWMA CHANGSAN,1,VINCENT HEKTE HMAR,2,Vocal Champ,1,World News,23,ZATAWN,1,
ltr
item
FOX JOURNAL: Jerusalem chungchanga Donald Trump Thupuong le a kakhawk thei ding awm
Jerusalem chungchanga Donald Trump Thupuong le a kakhawk thei ding awm
https://lh3.googleusercontent.com/-6f7bHXUOcLk/Wso7hHw9NhI/AAAAAAAAC70/o2IzZtcEaREFfN8WqVjOKjPoXKbTkao2QCHMYCw/%255BUNSET%255D cursor: pointer;
https://lh3.googleusercontent.com/-6f7bHXUOcLk/Wso7hHw9NhI/AAAAAAAAC70/o2IzZtcEaREFfN8WqVjOKjPoXKbTkao2QCHMYCw/s72-c/%255BUNSET%255D cursor: pointer;
FOX JOURNAL
https://www.foxjournal.in/2018/04/jerusalem-chungchanga-donald-trump.html
https://www.foxjournal.in/
https://www.foxjournal.in/
https://www.foxjournal.in/2018/04/jerusalem-chungchanga-donald-trump.html
true
6798813121781721492
UTF-8
Loaded All Posts Not found any posts VIEW ALL Readmore Reply Cancel reply Delete By Home PAGES POSTS View All RECOMMENDED FOR YOU LABEL ARCHIVE SEARCH ALL POSTS Not found any post match with your request Back Home Sunday Monday Tuesday Wednesday Thursday Friday Saturday Sun Mon Tue Wed Thu Fri Sat January February March April May June July August September October November December Jan Feb Mar Apr May Jun Jul Aug Sep Oct Nov Dec just now 1 minute ago $$1$$ minutes ago 1 hour ago $$1$$ hours ago Yesterday $$1$$ days ago $$1$$ weeks ago more than 5 weeks ago Followers Follow THIS CONTENT IS PREMIUM Please share to unlock Copy All Code Select All Code All codes were copied to your clipboard Can not copy the codes / texts, please press [CTRL]+[C] (or CMD+C with Mac) to copy