Fox Journal | Guwahati: Zani (07.05.2018) khan Shri Rajendra Agarwal, MP chair nain Guwahati ah, Citizenship Amendment Bill 2016 thu ah Joint Parliamentary Committee hai chun organization dang dang hai ko khawm in an ngaidan hai an lak khawm.
Hi huna hin mi pawimaw tak tak MP 15 party dang dang hai le Central le Govt. Of Assam tienga Home Dept. hai khawm an ṭhang a, hi bill chungthu a lungawi lo student inzawm khawm All Assam Students Union le 26 Students Organization NCHISF khawm an ṭhang a, N.C Hills Indigenous Students' Forum chu N. C Hills a Tribals Sixth schedule area aiaw a ṭhang an ni a, palai a hnuoia suklang hai hi an ṭhang,
1. David Keivom, President ISF
2. John Mark Pena, President HSA
3. Miteu Zeme, President ZSU
4. LamminJao Thangew
KSO(A) Vice President.
5. Robin Teron, President Karbi Students Association
6. Lalropui Hmar, Public Relation Secretary NCHISF HQ.
Assam Accord 15th August 1985 a MOU sign a lo um ta Central, Assam Government le AASU hai inkara 25th March 1971 hnunga Assam rama rambung danga inthawk a hung lut hrim hrim ieng ang sakhuona zuitu khawm ni hai sien an hung na rambung a thawn kir nawk vawng dinga lo ti ta angin, AASU le Assam rama 26 Indigenous Students' Organization dang dang hai chun ram dang mi hai chu an ram bawka kir nawk ro ti chu an lo khek pui ve chu a nih.
Citizenship Amendment Bill 2016 hin Assam Accord a 1971 hnunga hung lût hai po an hungna khuo a hai thawn kir dinga ti a ni lai zingin tuta Amendment Bill ruok hin chu Muslim ṭhang loin Bengali Hindu hai abik tak in Bangladesh an'thawk a hung inpêm lût hai BJP sawrkar in Indian citizenship pek an tum na lei a bill hi Amendment hi thaw tum a nih.
BJP sawrkar in hi Bill Amendment a thaw tum na hi Assam sûnga Political Party hai po po BJP thang lo le Student Organisation le NGO tamtak hai chun hi Bill hi Amendment thawlo dingin nasatak in an kal tlat.
NCHISF President Tv. David Keivom chun ''Hi Bill chungthu a hin Hills Area student inzawm khawm hai chun nasatakin kan kal a, hi le inzawm hin AASU le 26 Students Organization hai le inkawp hin kum liemta khan Agitation programme khawm kan lo nei ta a, a ṭul chun la nei nawk pei kan tih'' tiin a hril. Assam Ram a hin hieng Hmar, Kuki, Zeme, Biate, Vaiphei, Hrangkhawl, Karbi, Khasi le Rongmei hai hi OI (Original Inhabitant) Assam ram mi tak tak a pawm an ni leiin NRC chungthu a khawm harsatna hi a tlawm hle a nih.
COMMENTS