Fox Journal | CCPur: Khawvel a thil tlung zen zen lo, US President nina chel mektu Donald Trump in North Korean President Kim Jong Un le inbiekna nei an tih. Hienga N. Korea le inbiekna hi US President thungnaa inthung mek laia thil tlung vawikhatna ni a hriet a ni a, khawvelin a thlirin a tung em em.
Trump le Kim hai hi Singapore a five star Capella Hotel, Sentosa thlierkar a inbe ding an nih. An inbiekna an Agenda puithu ni dinga ring chu nuclear weapon chungthu niin an hril.
Trump hi Air Force One in Singapore a pan a, Kim ruok chun ama command bik lieu vuongna a nei naw leiin Chinese Airline pakhat hmangin Singapore hi a pan a nih. Tuhin Singapore hmun an tlung ve ve tah.
Chuong lai zing chun, Kim hi security chungthu ah a thlaphang nasa deu niin an hril a. Ram danga a cham sung hin that (Assassinate) a ni ding anga inngai na dam a nei niin chanchinthar thenkhat chun an hril.
Kim hi a pa thi, rorelna khawl a chel tan kum 2011 a inthawk a tiem tanin, tuta mi thangsain Official taka ram danga a suok vawithumna chau a la ni a, tuta tuma a ram dang suok hi a suok hlat tum tak a la ni nghe nghe.
Kim a changzie, a khawsak dan hi Journalist 3,000 bawr vel in Trump leh zinga (Thawleni) an in chibai hma po an cover ding a nih. Zinga zingkar dar 9 (Singapore local time) in Trump le Kim hi darkar 2 an pahni chauin tawng inlettu hmangin inbe phawt an tih. Chu zo chun an Adviser hai thangsain inbe sunzawm an tih tiin US official hai chun Associated Press an hril.
Trump le Kim inbiekna hi kum tam tak America le N. Korea inbiekna um ta naw hnung, a thu a inbei na le in vauna nasatak tlung hnunga a vawikhatna a ni leiin khawvel ngaiven a hlaw em em a nih.
COMMENTS