Fox Journal | Haflong: Zani (June 5) khan HSA Jt. Higher Secondary & Colleges Unit, Haflong chun World Environment Day, 2018 chu inser vein hlawk takin an hmang thu ei dawng.
Zingkâr dâr 10:00 in hunser hmang țanin zântieng dâr 3:00pm chen inser a ni a. Haflong Botanical Garden anthawk Haflong Govt. College chen motor lampui suk faina neiin thingkak hai khawm phun nghal a nih.
Hi hun hmangna a hin Pu Peter Sumer, Forest Ranger, Haflong Afforestation Range chu khuollien a ruot a ni a. Nk. Jenny Khawbung, Secretary Education, HSA JHSCUH chun program chu țhuoiin, Rev. Samuel Lalringum Thiek in Pathien kuoma țawngțaina neiin hun hawngna a ni a. Chun, hi huna hin HSA Assam Hills JHQ hai khawm fiel an ni angin Mr. John Mark Pena, President, Mr. James Selate, General Secretary le Mr. Lalramdin Tuolor, Secretary Statistics hai chun programme a tâwp chen an hmangpui a. Tv. David Keivom, President NCHISF le hnam hmangaitu le țhuoitu dang dang hai khawmin hi hun hi an uop bawk.
Khuollien le Special Invitees haia inthawk thu țha tak tak hai ngaithlak a ni a. Thingkak phunna hi Haflong Botanical Garden a nei niin, Haflong Govt College a Professor hai khawm College campus sunga thingkak inphun tir an nih.
HSA members thahnem tawk tak el an fekhawm a, fak le dawn hnienghnar taka buotsai nghal a ni thu report ei lakna chun a hril.
COMMENTS