Fox Journal || Gandhi Jayanti, 2018:
Vawituk dar 6:00 khan HSA Bangalore Branch member hai chun One-day Tour nei tumin Bengaluru khawpui a'nthawk Mysore tieng an pan. Hi One-day Tour a hin puitling 87 le Naupang 1 fe a ni a, chun Bus lien 2 ṭhuoi a nih. Bus number 1 starting point Specialists Hospital hmun a hin Nk. Irene Sangpui-in ṭawngṭaina a nei zo hnungin first pick-up point Kothannur pan nghal a nih. Chuong ang bawkin Bus number 2 starting point Johnson Market a hin Tv. Solomon Malsawmsang-in tawngtaina a nei.
Mysore hmuna One-day Tour a fe ding Bengaluru khawpui hmun hran hran a HSA member um hai chu pick-up zo vawng anni hnungin zing dar 8:33 khan Bengaluru khawpui suoksanin Mysore tieng an pan. Bengaluru khawpui suoksan tawm chun hi tour a fe ding hai po po aiawin Pu Daniel Lienthang-in ṭawngṭaina hun a nei zo hnungin hlim le inhawi takin Mysore an lo pan tah! Hi chanchin ei hriet chen a hin HSA Bangalore Branch member hai chun Asia Khawmuolpui a Biekin insang pawltak a ngai St. Philemona's Cathedral chu an sir ta baka Mysore Palace khawm an fang ta bawk. Hieng hai bak a hin, riruong dan chun Planet Earth Aquarium le Brindavan Garden a hai khawm fe ngei an tum bawk. Mihriem beisei angin a fe chun HSA Bangalore Branch member hai hi zan dar 10:30 velin Bengaluru khawpui an lut hman ngei ring a um.
HSA Bangalore Branch One-day Tour hi tour naran el a ninaw a, fe nasan pakhat chu hmun tin ramtin a'nthawka beiseina ṭhatak nei a Bengaluru khawpui hung lut hai khawpui fang malama anni lai inhmelhriet tuona le inlaichinna ṭhalem a um theina ding beisei leia huoihawt a nih. Hi lei tak tak hin hi One-day Tour a hin 'Love Feast' buotsai a ni a, hi ruoiṭhe na a hin Nk. Uniky Pasulate'n a sponsored vawksa but kil tlang a nih. Chun, hi tour a hin inzin malama inchuk ding thil tamtak hmu le hriet hai chu inchuk peia hmatieng kal pen pei ding, ti leiin "Explore - Imbibe And March Forward" ti hi thupui a hmang a ni bawk.
Thiltum ṭhatak neia khuol inzin HSA Bangalore Branch member hai hin an thiltum an sukpuitling ngei theina dingin ditsakna insangtak ei inhlân.
COMMENTS