Fox Journal || 6th of December, 2018:
Zani khan Bengaluru hmuna HSA Bangalore Branch chun phuisuitakin Sikpui Ruoi an hmang. Paalanaa Bhavana, Bengaluru hmuna 17th Sikpui Ruoi hmangna a hin Sikpui Pa chu Pu Ramhninglo Songhil a ni a, chun Chief Guest chu Pu Lalhrillien, MDC, ADC, CCpur, Manipur a nih.
17th Sikpui programme hi Tv. Solomon Malsawmsang le Nk. Lynda Khawbung haiin hnesawtakin an keithuoi. Programme hawngna dingin fekhawmtu mipui haiin 'Aw Kan Hmar Ram' an sak a, chu zo a hun hawng ṭawngṭaina Pi Sangzel Amo'n a nei. Chu zo a HSA Bangalore Branch a President ni lai zing Tv. Siema Zate'n mipui lawmlutna le Khuollien hai introduction le thilpek inhlanna hun a nei zoin, Pu Ramhninglo Songhil a'nthawk Sikpui Ruoi umzie le Sikpui thucha ngaithlak a nih. Hi zo a hin Chief Guest - Pu Lalhrillien a'nthawk infuina thucha ṭhatak tak baka State hran hran a khawsa Hmar nauhai ei vangnei zie chipchier takin a hril. Thuhril tienga a tawpna dingin Super Cop ti a hrietlar hiel Pu HT Sangliana a'nthawk thucha gaithlak a nih.
Hla tieng a chun, Sikpui Ruoi programme a hin Bengaluru hmuna eini mi Band umsun 'The Travellers' haiin mipui an inawi chun fekhawntu mipui hai a suk hlim hle. Anni bak a hin Hmar Artiste a khawm mi hrietlar pawl Nk. Rose Shakum le Puia Shakum hai khawmin Hnam hla le an hla thar hai sakna an nei bawk. Hieng hai bak a hin local Artiste, hieng - Nk. Verony Khawzawl, Nk. Grace Puruolte le Nk. Ramtharmawi hai a'nthawk hla nal tak tak ngaithlak a ni bawk.
Programme fe pei a chun Mr. le Miss Sikpui Ruoi thlangna nei a nih. Hi inthlangna a hin HSA Bangalore Branch hotuhaiin Bengaluru sunga iengkima tlawmngai insuo hlak pasal 4 le nuhmei 4 an thlangsuok hai baka a hmuna judge Tv. Randolph le Pu Robert L Sungte haiin Pasal 2 Nuhmei 2 an nominate. Hieng contestant hai hi an nuom tak thil inthaw tir a ni a, chun question round a um bawk. A tawp a chun mipui hai a'nthawk vote thlakin Sikpui Mr. dingin Tv. Samuel Lalrindika le Sikpui Miss dingin Nk. Galilee Chiru hai thlang an nih. Hieng Sikpui Mr. le Sikpui Miss hai hi Cheng 1,500 ve ve inhlan anni baka lawmman dang dang inhlan anni bawk.
Programme fe pei a chun kum bul laia ei unau Komrem hai le Joint Sports nei laia lawmman latu hai Sports Secretary le HSA Adviser Pu Jonathan Kungate haiin an nei. Chun, Hnam lam mawitak el HSA Bangalore Branch Cultural Troupe a'nthawk inentir a ni bawk. Chun, Sikpui Ruoi 2018 a hin Hnam inthuom a inchei nal tak Nuhmei le Pasal pakhat ve ve thlang suok anni a, chuong hai chu Nk. Sweetie Songate le Tv. Samuel Lalrindika hai an nih.
Programme tawp tieng a chun vote of Thanks Adviser Pu Robert Sungte-in a hrila, chu zo a Adviser Pi Dari Hmar-in hun suktawpna le ruoi inhlanna a nei zoin programme hi suktawp a nih. Programme induong a um hi zo fel vawng hnungin fe khawmtu mipui haiin ruoi inhnik tawktak el an kil thlang zo hnungin damtaka Sikpui Ruoi 2019 pha inhmu nawk dingin inṭhedar a lo ni tah!
COMMENTS