Fox Journal | Tuițhaphai: Churachandpur khawpui sunga um Rengkai khuo a Veng buk pakhat Thailane Welfare Committee (TWC) chun Jan. 19, 2019 chawhnung dar 1 PM khan inruithei an man hai chu Press Conference ko-in Media persons, TWC Ṭhuoitu le member hai, Pu Lalramsang Infimate Addl. DC (Adm), CCPur, Pu Romel Gangte OC/Drug Cell, CCPur Police le mihai hmu hawi ngei ah an rawhmang. Inruithei rawhmang a um hai hi Addl. DC (Adm), CCPur in ama kut ngei hmangin a raw.
Hi hun a hin Thailane Welfare Committee (TWC) aiawa thupuongtu Mr. PC Ngaia chun TWC in an Veng buk huom sunga inruithei thaw le nun dan mawilo uolau taka thaw le khawsa suktawp a nina dingin October 13, 2018 khan, Press Release siemin a bikin Thailane, Rengkai khawsung ah inruithei thaw le laklut khap a ni thu Nitin Chanchinbuhai ah an insuo thu a hril a, hi thu hi Churachandpur Police OC kuoma khawm inhriettir a ni el bakah police Officer khawm meeting a hin an hung ṭhang nghe nghe a nih tiin a hril. Hi thu pawisa lo le thawtu hai chu man le ṭha taka zilhau le counselling neipui an ni a, an sung-le-kuo hai kovin thaw ta ngai lo dinga intiemkam tir an ni zovin, inthla suok an ni hlak niin a hril bawk.
A hril pei danin mihriem an man po hi 92 an ni a, man an nina sanhai chu Zu dawn (Wine Local made and Foreign), Heroin injection (No.4), WY hawp, Nganza hawp (Ganja/Marijuana), Detoxification damdawi zawr le thaw, chun, Nuhmei pasal nundan mawi lo taka khawsa hai an ni hlak thu a hril a. Mi mana umhai lai hin civil, sipai ṭhanglai le sawrkar sinthaw dam an ni tawl thu le inruithei an man hi cheng ₹ 5,000 vel manhu ding, mi man a um hai khawm hi khuo hran hran khuo 36 le Manipur a District tum tum 6 haia mi an ni bakah an man hai hin an inhmu char a ṭi taluo leia an inruithei thaw tum le kawl lai hai an lo dehawn hman khawm a um hlak niin a hrillangsa bawk.
Hi hun a bawk hin Thailane Welfare Committee chun an thiltum hrilin hi khawvel hi hmun inhawi, him, thienghlim le chengna tlaka siem a, India khuo-le-tui ei nina angin ei theina po po insuoin ei ram le ei khawtlang changkangna dingin thilṭhanaw le nundan mawilo le pawrche hai sukbo dingin mitinin ṭhang la tlang ei tiu tiin ngenna an siem niin a hril. Source: LRS Puruolte
COMMENTS