Tulai Tuițhaphai - II (February 9, 2019)

- Jr Amo, Fox Journal Street

Manipur a SSA le RMSA haiin sawrkar thawktu dang hai anga an hlaw la țha thei loa an um ran le a san dan dang leia nuorna an nei chu Tuițhaphai hmuna SSA le RMSA thawktuhai chun lo zawm ve in ZEO Office an khar a. ZEO gate tala a kal in, gate ah hieng thu inziekna - "NO PAY NO WORK" , "WE TOO HAVE FAMILIES", "STOP DISCRIMINATING SSA & RMSA TEACHERS" ti ziek le a dang khawm lekha varin an târ. Hi lei hin Tuițhaphai sunga lekha inchukna khawl bulpui tak Zonal Education Office (ZEO) chu sinthaw thei loa sukchawl a nih. Sawrkarin a mihai nuorna hi a thu a hril le ziek hai hi uksak hlak sienla chu, Bandh/Shutdown/Office khar le nuorna dang dang hai tlawm phâng a ta, ei hnufuolna a inthawk inkieng zai ei rel met met thei ka ring.

Tuițhaphai sunga Diesel Auto a pung hrat em em a, hi lei hin document mumal nei loa Auto service an tam pha. District Police hai hmalaknain, zani hmasak lai khan Diesel Auto Service hai khalkhawmin documents hai enfelna an nei a. Documents mumal nei loa service tam tak manin pawisa an inchawi tir, pawisa chawi baka hin iem an law ei hriet sap ta naw a, ei ni laia inhremna pakhat a ei ngai le a thawtuhai lungawina chu pawisa inchawitir hi a ni el awm! Dan anga inhremna tihai hi chu ei la uksak taluo naw nisien a hawi.

Tulai hnai Manipur sawrkar Department dang dangin sin ruok sukbitna ding Notice an suk suok le inzawmin, Employment Exchange,Tuițhaphai, CCPur chu a lun hle a. Țhalai - nunghak le tlangval tam tak sin nei lo Tuițhaphai ruom sunga hin ei tam zie innghil ruol an nawh. Ei khawtlang in zirtir dan hrim ah, eini rawi chu Sawrkar sin bak hi ei lungril a inleng lo a ni leiin ei lungril le ei khawnghat ei thlak danglam naw a ni chun sawrkar sin nghaka tar kun a kun el ding um ei tih. Sawrkar sin hlak chu ei renga changkip siem a ni awm si naw a, a thiem filawr tak tak ni phak si loa nu le pa lungawina ding chaua Exam ziek hi tam tak ei um tah! Chuong nek chun, sawrkar sin chau in kawkhmu ta loin, sawrkar sin kher ni lo hai khawm hi ngaihlut nachang ei inzirtir chu a țha vieu ta annawm a nih!? Chu le inzawm pei chun, hi hma met khan Saikawt ITI a instructor țhenkhat an pension ta leiin post pathum lai zet sunzawm thei ta loin a la um ran a, Manipur state sawrkar hnuoia Electric Department MSPDCL le MSPCL in sin an lak ding le inzawmin ITI certificate hi a pawimaw em em a, eini rawi tlangmi hai chu hi certificate hi nei thei loin ei um mek a nih. Instructor Post ruok hi sukbit loa um ran a la ni a, tawp sawng thei khawm a ni el thei, hmala thei le bawzui thei tuhaiin ngaiven le uksak vat vat thei nisien chu ei țangkai tlangpui seng ding a nih.

Tuițhaphai sung chau ni lo, Manipur state sunga ding khawma Nurse inchukna changthlung pawl tak Bethesda College & School of Nursing chun GNM 1st Year Lamp lighting ceremony le 21st Batch GNM Graduation Service an hmang a. Lamp lighting thaw GNM 40 le Graduate GNM 38 an nih. Chief Guest, GS Haupu (Singngat MLA) in Bethesda inchukna hmuna hmang ding solar light le transformer, electric tienga harsatna sukbona dingin a theitawp suo dingin an tiem.

Khawmuolpui țhenkhat ah rinum le harsatna intlun raka ruotui an dawng laiin Tuițhaphai khaw ințhal chu a la zuol pei a. Tuikhur nei naw hai ta ding chun khawsakna ring nekin a harsa hrat hle. Vadung hmang thlak lem hi chu a tam ta naw a, hmang thlak umsun hai khawm khurtekem cho a, țhal tui kang nghak a nghak țul tieng dam an ni tah. Mihriem haiin ei kawl le kieng a thing le ruo hai humhal nachang ei hriet naw a ni chun hieng neka hun rinum ei la tuok pei ka ring. Kum 10 chau liemtah kha ei zuk thlirkir chun, vawisun ang huna hin tui dawn (Drinking water) ding inchawng ei tih ti kha tukhawma ringin ei lo suongtuo hlak ring a um nawh. Ei nitin khawsak dan a lo ni ta der el! Thing le ruo, ei kawl le kieng a um hai, vadungte le vadungpui hai ei humhal țan a, țhang ei lak țan a ni chun, ei ram chu la sie lo tak chu a nih.

Ei hmatieng thil ngaituo a buoi chuoi chuoia ei um laia tuta ei ngirhmun ei inthlada a ni chun hmatieng ngaituo rak inla khawm thil țangkai taluo ni naw nih. Ei hmatieng țha le ditum ei beisei chun vawisun hin a ziektu le nang țhang tlang ei tiu. Mimal in ei ințan naw chun, mipui in ei thaw thei nawh. Mimal sengin ei chengna ram ta dingin țhang la thar ei tiu.

The future depends on what you do today - Mahatma Gandhi.