DC, NHAI le N.C Hills Indigenous Student Forum haiin Lumding-Silchar road siemna ding thu a joint meeting an nei

Fox Journal: Vawisun - 13th April, zing dar 11 khan Pu Amitabh Rajkhowa, Deputy Commissioner Haflong a chair na hnuoi a District Administration, NHAI le N.C Hills Indigenous Student Forum hai chun Joint meeting nei an nei. Hi meeting hi NH-154E (Package No. As-21 Jatinga-Silchar le As-22 Maibang-Jatinga) lampui sietna hai siem dinga ISF haiin ngenna an lo siem angin DC hin a ko a nih.

Meeting a hin ISF palai hai chun Chief General Manager, NHAI Regional Office Guwahati in September 2017 lai dei a Jatinga-Silchar sietna hai site visit nei a ni laia 23 crores a siemna dingin sanction dinga an tiemna chu vawisun chena sukpuitling a ni naw nasan NHAI hai chu indawn an nih.

NHAI Palai hai chun AS-22 Maibang-Jatinga road chu hnina lo siem ang ngeiin 24 Crores chu sanction a lo ni taa tender hai iengkim sukfel a ni taa, chu sin țan na ding in Contractor kuoma Code of Conduct a ni leiin work order pek dawk thei a la ni naw leiin sin hi tan a la ni naw thu an hril a, Deputy Commissioner chun sin hi țan a ni thei dan ding lampui hi lo dap in state Government kuoma lo intlun dingin an tiem.

Chun, AS-21 Jatinga-Silchar road thu a hin NHAI hai chun lampui siem thatna dingin  Estimate pahni 20 Crores le 49 Crores chu NHAI Head office Delhi a approval dingin an thawn ta thu an hril a, hi thu a hin ISF Palai hai chun 20 crores chu a sietna po po siem thei a ni naw ding a ni an ti  leiin 49 Crores chu approval thaw lem dingin thuthlukna an siem a nih.

Lampui hi a sie ta em leiin fe le hung inzin mi ta dingin nasatakin harsatna an tlun tak leiin NHAI hai chun zinga (14/04/2019) anthawk repairing sin tan ngal dingin thuthlukna an siem. Chun, Head office Delhi a inthawk approval hmu hma po a dingin CGM in emergency fund a sanction thei 4 Crores chu lampui repairing thawna dingin sanction a tih. Project Director, NHAI Haflong office  chu 04 crores estimate chu submit nghal dinga inhriettir a ni bawk.

N.C Hills Indigenous Student Forum hai chun DC le Media haiin an thilthawna hai țha taka an thlawp pei leia hi chen tlung thei an nina ah lawmthu an hrilsa.