Fox Journal | Haflong: 8th April 2019. N.C Hills Indigenous Student Forum hai chun Pu Amitabh Rajkhowa, Deputy Commissioner chu a Office Chamber a in hmupuina neiin memorandum an submit. Memorandum a hin NH-154E ( Package No. As-21 Jatinga-Silchar le As-22 Maibang-Jatinga) road chungthu an hril a. Hi Lampui chungthu a hin NCHISF chun vawitam NHAI ṭhuoitu hai a lo inhmupui ta hlak a, siemṭha ding ngênna an lo siem ta hlak bawk, lampui hi fûr ruotui a hung sûr ṭan hin mipui le sumdawng mi, inchûklai naupâng le damnaw inrik hospital pan ṭul hai in namênlo in harsatna an tuok hlak a nih.
Liemtah 5th February 2019 khan NHAI Chief General Manager chu NCHISF ṭhuoitu haiin a office ah an inbiekpui a, hi inbiekna dungzuiin fûr ruotui sûr hma ngei in lampui sietna hai hi Full blacktopping a siem hman vawng dinga ti a ni a, Estimate hai NHAI Head Office Delhi a pêklût a ni nghâl a, amiruokchu, tuchen hin approved a la ni naw leiin sin hi ṭan a la ninaw zinga NCHISF chun DC kuoma NHAI hai in an thil ti an sukpuitling naw na thu a khir tak le rîk taka an chunga hma la dingin an ngên a, chun NHAI haiin sin hi an ṭan nghal naw chun ISF chun kan thil ngên kan sukpuitlingna ding in a ṭul ang dungzui in hma kan lâk pei ding a nih ti'n DC kuoma thu an intlun.
Hunsâwttak ISF palai hai le DC inbiekna an nei hnung chun DC in Joint meeting NHAI hai le 13th April 2019 hin haflong a la nei phawt dingin a hril a hi joint meeting a hin Chief General Manager, NHAI Northeast incharge khawm ṭhang ngei dinga ti anih.
COMMENTS