Pu Lalhrillien le HYA Tuiṭhaphai Jt. Hqrs. in rangva bundle 19 le a kilna ding hai an sem

Fox Journal | Tuiṭhaphai/CCPur: April 15, 2019 sun a thlipui hrangin a suksiet mihriem chengna in a sie nasa zuol bik hai chu kanin April 16, 2019 sun khan Saikot bieltu MDC le EM, ADC Churachandpur Pu Lalhrillien le HYA Tuiṭhaphai Jt. Hqrs. ṭhangruolin rangva bundle 19 le a kilna ding hai an sem. MP Election le inzawma Model Code of Conduct um lei le DC tienga inthawka relief fund pek suok el thei loa a la um leiin Saikot bieltu MDC le EM, ADC Churachandpur Pu Lalhrillien in ama sum senga a lo ngaituo le HYA Tuiṭhaphai Jt. Hqrs. in ṭhangpui ngai zuol bik a lo thlang suok hai kuoma ṭhangpuinaa rangva bundle 19 le a kilna ding hai hi Saikot, Muolvaiphei le Saidan khuo haia a sie nasa zuol bik hai sem an nih a, thlipui hrangin a suksiet in hai hi khawtlangin hnatlang neiin an siem ṭha pek tawl a nih.

Hi le inzawm hin DC, Churachandpur tienga inthawk chun inhmaw thil thu a chun Tarpaulin le Dal ti hai ang bak zuk hmu el thei ding a um naw thu hrilin Saikot bieltu MDC le EM, ADCC Pu Lalhrillien an ngenna anga ama'n rangva le a kilna ding hai sema um hai chu a hung ngaituo tah niin HYA Tuiṭhaphai Jt. Hqrs. chun an hril a, ṭhangpuina pek bika um hai hi ṭhangpui ngai bik zuol hai niin an hril bawk.

Pu Lalhrillien chun April 15, 2019 sun a thlipui hrangin mihriem chengna in a suksiet hai hi ṭhangpui dan ding ngaituoin thei tawpin hma a lak nghal a, Chairman, ADCC; CEO, ADCC le SDO, Saikot Sub-Division hai khawm hi thu a meeting neipuiin thil umdan hai le hmalak dan ding hai a hriltlang pui a nih. Hieng lai zing hin mi ṭhenkhatin a naw zawngin Pu Lalhrillien hin ngaisak lo le biek thei lo ang damin thukhelin social media a hai an lo hrilsiet hman a, ṭhangpuina dawngtuhai ruok chun Pu Lalhrillien le HYA Tuiṭhaphai Jt. Hqrs. hai chunga hin an lawm hle thu an hril.