~ Fred Lalramsan Khawbung
Vaihai thil chîng pakhat chu tienlai le tulai chen khawm a bikin khawte a hai hin Bûng kûng (banyan tree) hnuoiah thung bumin, upa hai a inthokin thuvar le inchûktirna tha tak tak an dawng hlak a. Sielkhawpui a ve thung ruok chun a chi a dang daih. Bung kûng hnuoiah ni lovin, Bûng kûng sak lai met, dawrtehai tuolah a hawn hawna inthung bûmin ei gawp hlak a. Topic a fûk deu châng lem chu bengvâr pha sawtna ding a tam ve thei hle an naw! Tum khat lem chu kan titina thupui khawm ‘hlawtlingna’ (success) a ni ve khanglang a. Ringnekin hril ding a lo tam ning a tih, ngaidan thelut kan inchu sap sap a. Chu lai tak chun ka cell phone a hung inri ral ral a, ka zuk dawn a “zan a sawt tah ie bawi, hung inlawi el ta rawh” a hung ti a. “Thuawi a tha” tiin dittawklo deuin ka ruol hai ka mangtha a, kan lawi san a. Sana en ding theinghil rak khawpa gawp thet chu a muk awm char char maw! Kha tuma ka bângna kha a laklaw em leiin la hei bei sunzawm nawk ka nuomn tlat leiin ei ‘Thalai Weekly’ ah ka hung gawp zawm nawk a nih, ka gawp chanpuihai! Thalai news a ni leiin tulai deu atin ka hung ziek a nih. Mi lo hrethiem ro.
Hlawtlingna ei ti hi iem a na? Mi hlawtling ei tihai chu tuhai ang him an na? Mi hlawtlingah min an ngai che am? Nang le nang hlawtlingah inngai am? In dawn ding le dawn ding a tam. Hi zawna hi mani senga dawn chi a nih. Mi dang tukhawmin an dawn pek thei naw che. Khawvel a mi po po hi ei nuom zawng, ei dit zawng le ei thil ngaituo dan an ang naw seng, chuong ang bawkin hlawtling ei nuom na kawng khawm an dang seng a nih. Chuleichun, hlawtlingna ei ti hi mi po po chunga dingin hrilfiena thuhmun pek thei a ni nawh. Mani sin hrim va thaw zona le hlenna hi saphai chun ‘Accomplishent’ an tih a. Chuong ang thil chikte te anga inlang khawm nisien a dawt dawt le a hmatiema thaw faina le hlenna hung infinkhawm chun hlawtlingna ‘success’ ei ti hi a hung siem a nih.
Accomplishment can be seen as the process to become successful. It is the results that we plan or expect to occur. Success is the positive consequence or outcome of a series of achieved accomplishments.
Thil pakhat ei hriet thello ding a um, chu chu hlawtlingna ei ti hi a changtu ta dinga lungawina an tlun naw chun mi dang ngaiah hlawtlingna nisien khawm ama ta ding chun hlawtlingna indiktak a tling zo nawh.
Mi tamtak chun sin tha tak nei, in le lo det nei, exam na a result tha tak nei, sumdawngnaa hmuingil, an nawleh degree insang tak lâk hai hi hlawtlingah ei ngai hlak; an dik, amiruokchu thil po po a ding chun a ni chuong kher nawh. Tulai khawvel le media in hieng ang ngaidan an min neitir hi a pawi hle, ngaidan indiklo a nih. Mihriem chu a nina le thil neiah hlimna a hmu naw chun hlawtling ti thei nawng ei tih, asan chu a thil nei le ninain hlimna intlun loin beidawngna intluntu ani lem si a! College a kan senior pa khawm multi-national companyah sin a hmu ve a, thla tin digit 6 vel sum lam dawk thei chin a nih. Kan hotu hai khoma ‘a hlawtlingpa’ ti in a chanchin an hril rawp hlak. Amiruokchu ama chun hlawtlingah an ngai thak nawh. Thawsuol an ti em em lem dei a nih. A san iem a na? Sin thaw lovin sin in ama a thaw lem tlat an nawm! Zing dar 9 a inthawkin zantieng dar 5 chen office-ah an thung a, chu khelah in tieng a thaw ding sin a mansapui puom rak khawp hawn a nei sa zie bawk. Tulai hnai el a kan inbiek na a lem chu “hlaw tam hle sienla khawm ka contract bo phat chu ka tawp san tum an tah” a ti dai a nih. A sin insang le hlaw tamin hlimna a pêk naw a; nun zalen nei lo le ruol nun inhnarin a um lem hlau a nih. Hi taka inthawk hin khawvela trophy ei dawnghai khawm hi hlawtlingna inchikna a ni kher nawh ti a chieng hle.
Puotienga inlang dan le khawvel thlir danah mi hlawtling anga inlang an sungril tak ruokchu hlimna le hadamna nei derlo an um hlak. Chuong ang mi chu hmutheia hlawting anga inlang, hmutheilo a mi hlawsam an nih(visible success but invisible failure). Sin hi a chin le a lien thu an nawh, ei sinah hlimna le hadamna ei hmu naw tlat chun mi hlawsam ei ni tlat a nih. Ei nina le ngirhmun miin min hnar hehu naw hai sien khawm, ei nun a hlima ei thlarau a hadam tlat chun mi hlawtlingah inngai ding a nih.
Hlawtlingna le lungawina hi Hausakna le nina insanga zawng chi an nawh. Tulai news ei hang en chun mi lien le mi inlar, a hlawtling a ei ngaihai, harsatna le beidawngnain a bawm vêl hmu ding tamtak an um. A thenin scandal an nei a, a thenin inruithei an zawngsak a, a then lem chu mani le mani inthat hiel khawm an um. An reng hin mi vantlang chung, mi inhnar an nih. Tum ram tlung le dit ang nei ringawt hi hlawtlingna an naw a, lungawina mi petu a ni bawk nawh.
Chuleichun, mani inthunun theina hi tum ram mi thuoi tlungtu a nih. Chu chu hlawtlingna kawtsuo a ni nghal bawk. Hringnuna rohlu chu ruoltha, ngainatu, hmangaitu le suongkuo hai hi an nih. Hienghai po po hlutna inhmangtu chu ieng anga tam neiin ngirhmun insangah um de sien khawm hlawtlingah inngai ngai naw nia khawvelah lungawina tak tak hmu ngai bawk naw nih. A thlarau nun chu a chunga ei hril hringnun rohluin a hluo lo a ni leiin a kawruok a, mal ngawi ngawi a inngaina a nei a, hlimna le nun hadamna a nei ngai nawh. Hringnun hlim taka hmang ran puma mi ta dinga thil tha thaw zing hi kei ka goal a nih. Ka goal hi ka achieve sung phawt chu hlawtlingah inngai ka tih. Chu chu Pathien dit dan tak khawm a ni hrim a nih.
“Discipline is the bridge between goals and accomplishment” ~ Jim Rohn.
COMMENTS