Sielmat: Independent Church of India (ICI) chun inkhawmpui lien (General Assembly) vawi 70-na chu December 4-8, 2019 inkar sung khan Roberts' Jubilee Chapel, Sielmat, Churachandpur hmun ah "Suol Do" (Hebrai 12:4) thupuia hmangin hlawtling takin inkhawmpui chu Pathienni zan khan a lo țumțiek tah.
 |
| Moderator ni lai mek in Vice Moderator kuoma Moderator Charge an hlan lai. Rev. SK Songate V. Moderator a thlang thar a nih. Image credit Muona Infimate |
Assembly palai mi 227 an fe a Council Hall ah 157th Executive Council, 70th General Assembly Session le 158th Executive Council Session a hai ro țhahnem tak el rel a nih.
Pathienni zan khan Upa Dr. H.L. Liensang, Moderator, ICI in kum 2020 a kum thupui ding hawngna le Pathien kuoma inhlanna hunser a hmang a. Hi huna hin Moderator ni lai mek Upa Dr. H. L. Liensangin, Vice Moderator ni lai mek Upa Dr. Zawlthanglien Changsan kuomah Moderator charge a'nhlan a. Assembly palai fekhawm haiin Vice Moderator thar ding Assembly hun a an thlang chu Rev. S.K. Songate a nih.
Rev. Lalhmingthang, Secretary, Ministries, ICI in Ordination service hunser a hmang a, Pro Pastor H. Lalhmunsiama le Pro Pastor R. Laltanpuia hai chu Pastor ding a namnghet an ni a. General Assembly Secretary in Pensioners hai inhmelhrietna le Pension Service hunser a hmang a, hi huna hin thawktu - Rev. H. Chungthang Thiek, Evangelist at Large, Rev. Jaya Kumar, Principal, SBC, Pastor Lalthangkung, Evan. L. Atom Kom, Missionary, Upa J. Tlura, Teacher, Upa Hmangneikam, Office Clerk le Evan. K. Angam, Missionary hai chu pension pek niin an rawngbawlna a hai thang an suo na zarin chawimawinain kohranin Thangsuopuon an siltir a, Upa Dr. H.L. Liensang, Moderator in tawngtaipekna a nei thu report chun a hril.
Assembly in kum 2020 sunga kohran annual budget dinga a pawm chu tangka crore 11.13 a ni a. Kum thar 2020 inkhawmpui lien innghatna hmun ding chu Tuițhaphai Presbytery bawk niin Rengkai local kohran in an mikhuol ding a nih.
Inkhawmpui sung hin Rev. Michael Z. Zote, Academic Dean, SBC, Rev. B.L. Sandam, Secretary, Finance, ICI, Rev. H. Chungthang Țhiek, Evangelist at Large, Rev. Lalramlawm Inbuon, Evangelist at Large le Upa Dr. H.L. Liensang, Moderator hai a'nthawkin Pathien thu hrilna hun an hmang a. ICI Central Choir, NPT Choir, Bethesda Choir le Tuițhaphai Presbytery sunga khawtin a Kristien Thalai Pawl ha'n inpakna hla sakin hlaa rawngbawlna hun an hmang bawk niin report chun a hrilsa.
COMMENTS