Fox Journal || 8 January 2020:
Tulaia khawvel mipui hrilhlaw tak, ti khawma inkhel bek bek lo ding US le Iran buoina chu tawp el nekin a zuol kai pei niin an lang.
File photo
January 3, 2020 khan American za tamtak that tu a intum Islamic Revolutionary Guard Corps General Qassim Soleimani (62) chu Iraq capital Baghdad hmuna American haiin missile-in (drone hmangin) an that a, hi lei hin Middle East boruok chu a suk sosang hle. Hi thil tlung leiin Iran chun an General Qassim Soleimani phuba an lak ngei ding thu an puong laiin, US Prez Donald Trump ruok chun an mi that hi thi tlak reng angin a puong ve thung. Vawituk khan General Soleimani phuba lakna dingin, Iran chun Ballistic Missile 20 nek a tam Iraq ram sung a um US venghimtu pawl hai umna hmun 2 chu a kap. Iran thusuok dungzui chun, hi missile attack na a hin mi 80 thiin, ralthuom le lirthei khawm tamtak a sie angin a tarlang. Iraqi Defense Official thusuok ruok chun hi thil tlung leiin American le Iraqi hrim hrim thi le hliem an um naw thu a tarlang ve thung. Hi chungthu a hin, US chun iengkhawm hril a la nei naw a, Donald Trump a Tweet tawpna tak a khan chu zingkar (US - EST) pha statement pek a ni ding thu a hril.
Ei thil ziek hi ei hriet chieng zuol dan dingin, tienlai chanchin zuk hril kai zawk ei tih. 1979 Iranian Revolution hma khan US le Iran hi ruolțha em em an ni a, amiruokchu, khang lai huna Iran Lalpa - Mohammad Reza Shah, revolutionaries haiin an ram a'nthawk an hnawt suok phing khan, hieng rambung pahni hai inlaichinna hi a hung sie deu deu an tah. Iran Revolution laia an hotu tak Ayatollah Khomeini ram danga exile a um Iran a hung kir hnung lem khan chu revolutionaries haiin US embassy runin hostage tamtak el ni 444 sung zet an hren tang. Hi chanchin hi Hollywood Film 'Argo' a khan en nuom um em emin siem a ni nghe nghe.
Ei thu ziek a bawk kir nawk inla - tulaia US le Iran buoina suok lei hin Obama President hun laia Iran-in Nuclear Deal a sign ta chu a hnawl ta a, President Trump ruok chun 'Iran hin iengtik lai khawma Nuclear Power nei ngai naw nih' tiin a hril ve thung. Vawituka Iran ram sunga an Supreme Leader Ayatollah Ali Khomeini hril nawk dan chun, Iran rambung kuom lai vel a um (read as Middle East) US venghimtu pawl hai hi um ta naw phawt phawt hai sien tiin a hril. Chun, hi buoina lei hin, Iraq Parliament chun US le a thlawptu rambung dang hai chu an ram (Iraq) a'nthawk suok dawk vawng dingin thu a lo passed ta bawk.
Tulaia US le Iran buoina hi World War lll intluntu a ni el di'm, am, indo loin hieng rambung pahni hai kar a hin inremna țhatak innei tirtu a ni pha hlau lem el ding am, ti chu lo hei thlir pei ei tih.
COMMENTS