Fox Journal | Zairawn: “I vanglai nihaia chun nangma siemtu che chu hre zing la...” ti thupuia hmanga Jiribam district Zairawn khuo a ICI Țhalai inkhawmpui lien vawi 36-na Feb 14-16, 2020 inkar sunga hmang chu Pathienni zan khan a țumțiek.
Pastor Dr. James R. Ruolngul; Associate Evangelist at Large, Upa Evan John; Secretary Finance, Rev. BL Sandam; Executive Secretary, Rev. Dr. JL Songate le Youth Coordinator, Rev. HP Runremthang haiin inkhawmpui hun sung hin Pathien thutak hrilna hun an hmang seng.
 |
| Țhalai Day Feb 16 hall hma a inser lai |
State tum tum a inthawk mikhuol fekhawm reception a inzieklut Zairawn khuo a rieklut hi mi 1,300 an ni a, inlan 650 niin mikhuol fekhawm po hi mi 1,950 niin a hmun a inthawka report chun a hril a. Inkhawmpui lien palai 148 an fekhawm bawk a nih.
Inruolsiekna chi tum tum nei a nih a. Lamphel ICI Țhalai hai chu biel pumpui a ODC pe țha tak lawmman inhlan an nih a, Guwahati City Church haiin Overall Activity lawmman an dawng ve.
Guwahati City Church hai hin Buonglienkung Music Award (Hlapawlpui) a thiem tak lawmman dawngin Meghalaya West le Assam Hills Presbytery haiin a pahnina le a pathumna an lak a.
Malzai – Rev. Thangngur Music Award ah Tuițhaphai Presbytery member Grace Ramhlukim chu a thiem tak lawmman dawngin Assam Hills a inthawk Elina Riengsete le Vangai Presbytery member Sophia Lalparmawi haiin a pahnina le a pathumna lawmman an dawng ve ve a nih.
Pathienna zan inkhawm hun ah YCO chellai mek Rev HP Runremthang le YCO thar Upa Evan John hai charge inhlansawngna hunser ICI Moderator le Executive Secretary hmuhawia nei a ni a, inkhawmpui lien hmang hun sung hin ICI Central Choir haiin hla a rawngbawlna an nei bawk thu source chun a hril a.
Inkhawmpui lien a vawi 37-na chu 2021 khin Assam Hills Presbytery a innghat dingin inkhawmpui palai haiin an rel niin source chun a hrilsa bawk a nih.
COMMENTS