Ziektu: Samuel Lalbelsang, Chief Administrator, Fox Journal
Ei tulai khawvêl hmang mêk a mi huolkhumtu, technology hin ei inchûkna, ei sinthawna le ei nitin hun hmang naa hin nghâwng nasatakin a nei a nih. Technology tamtak insang tak tak a uma, amiruokchu inbiekpawna dinga ei hmanglawn tak Mobile phones hin ei hringnunah hmun a hluo lienin ṭhatna le sietna an tlun ve vea abikin sietna a'ntlun rawn lem a nih. Mi tamtakin chanchin inpêksâwng na’n ei hmang laizingin ei sietna ding intlun theitu ani nawk ve a nih. Ei thilthaw le ei hun hmang a hai technology ei hmang chu thilṭha a nih. Amiruokchu ei technology hmang hai hi a huntâwk umlo, insûmlova ei hmang ani ruok chun ei tadinga sietna nasatak a nih. Technology ei hmangna kawnga hin ei lût inthûk el bâkah ei kawpdet ta khawp el, entirna’n ei phone hai abikin. Khawlai hmunah khawm fe inla phone bova hun hmanglo hi ei um bêk ta nawh.
Ṭhenkhat ruok chu television (TV) en an inhnik khawp ela, thilthaw ding laklaw tamtak nei hai sienkhawm TV ah an serial annawle an film ennuom a suok chun, ka en naw chun zânah ka in theinaw ding ti nih âwmtakin en lovin an um thei naw a nih. Ṭhenkhat nawk chu hla rak lova fe ding khawma motor bova fe theilo, hiengang lei hin ei taksahai ei sawizawi naw leiin hrisêllo tamtak ei um a nih. Technology ei nei hai a hmangdan ei thiemnaw leiin Technology suoka ei intang mêk a nih. Ei hun hlutak hmang ṭangkaina ding tamtak hi ami fâksiet peka ei thaw ding tamtak ami sukchai hlak a nih.
Technology a ei ngawlveina a hin ei taksa bâkah ei lungril ta dingin harsatna tamtak an tlun a nih. Tulai mi tamtakin tuola suoka insawizawi annawleh ruolhai le inpâwl nêkin insûnga inkhuma phone khel hi ei thlanglem ta a nih. Ṭhalai tamtak an phone annawleh game inhnel ding leia khawtlâng le kohran lai inzêl lova ina an inkhum el hi a ṭha naw el chau nilovin lungril sâwlna an tlun thei a nih. Hibaka hin thil iengkim hi a hun le hmun hriet a ṭul bawk a nih. Mani le mani nasataka inkhuokhir thiema, technology hieng mobile phones hai khawm puipung Ni a dam, thilpawimaw rel huna dam, Biekin a dam hmanglo thiem hi inchûk a pawimaw em em.
Thilsiem le technology hi inbûktâwka hmangthiem ei vâng khawp el. Ṭhenkhat technology a an ngawlvei leia thilsiem hai an uksak naw laia ṭhenkhat ruokchu thilsiem hai an inhnik leiin technology hmang nuom lovin tienatlânga an hmang hai hmangin tulai tuollêng an phâk naw a nih. Inbûktâwk a hmang ding chun a pakhat lem lem a chuong liema hmanglo ding a nih. Hienga ei hmang chun ei inchûkna, ei sinthawna le ei nitin hun hmang hai technology hmangin hung awlsam ta’ng a ta thilsiem hai hmangin ei hung hrisêl pei ding ani leiin technology le thilsiem hi inbûktâwka hmang a pawimaw hle.
Thil pawimaw em em tulai ei khawvel pal mêk le inzawma ei hrietding ei hrilnuom chu hi hi a nih. Tulai Mobile phones technology hmangsuol ei um rawp hlak lei hin chanchin thawndarna kawngah fîmkhur a ngai hlea. WhatsApp le Facebook a thu an hung forward/thawnsâwng nazawng hi thudik ani vawng nawa, ṭhenkhat phuokfâwm annawleh mi insuosa siemdanglama insuosâwng anni hlak. Tulai natna hri ṭiumtak inlêng a khawm hin thudik nilo chanchin phuokfâwm a tam hlea, hiengang thu bêlchiengdâwllo thawndar hi India dân khawmin a phal nawa, man le jail bang zût theina ani leiin hiengang lakah hin fihlîm tum ei tiu. Hi bâkah hieng mithi thlalâk, thlalâk mawilo thawndar khawm hi dânin a phal naw bawk a nih. Ei rêngin ei thu thawndar hai hi thudik ani am ti bêlchieng phawt inla ei thu thawndar naa hai khawm hin fîmkhur ei tiu.
Technology ngawlveinaa inthawk le jail bang zût theinaa inthawk him ei tiu!!
A tâwpna taka dingin, technology hi a remchângna le a awlsamna leiin a ngawlvei a awl khawp el a, technology hmang nasa lova thilsiem le technology inbûktâwk hriet hi a pawimaw a nih. A'n bûktâwk ei hrieta ei hmang thei anichun, ei damsûng hun tawite a hin ei tadinga hun pawimawtak mi siempêkin ei nitin hun hmang hi hlimin lungaina ei nei naw ding a nih.
COMMENTS