Khawvêl Chawkruoltu Kawrawna
By Pulamte Rose
Aw Kawrawna(Covid-19) khawvel chu i chawkruol hne ngei de maw. I zarin kan khawvel chu an khaw vel vawng an tah ie. I ṭhang naw khawma an khaw vei leh, kan mamaw naw vei che leh maw. Iem hril tâng kan ta, khuonu ruotin eilo intawng ta sia.
Mihausa mipasie tlang hmunkhata imin leng tira. A hausa khawmin a pawisa hmangna ding a hriet nawa a hriet khawma a hmang thei nawh. Mipasie sum neilopa le thuhmun tho anni tah. Thlierhran i nei nawa imi bel ngam vawng bawk leiin kan rengin kan ṭi che. Mi tamtak sumhnâr i suk kanga, sinthawna in hai imi kharpeka, harsatna intlun rawn ngei de. Fak ding neilo, sum neilo harsataka mani inlum pana fe, ṭhenkhat lama thamral hai hi i en liem el ngam ani?! Khawpuia um khawm kan piengna rama hai imin kirtira. Kan Doctor, Nurse,Police le a dang dang inkharkhip theilova um hai hi i suk rimsi ngei de maw. A hausa khawmin a sumin a'n sukdam theinawa a sum nei a sawr naw hle. Hi huna hin kan Mr le Miss hai, kan Filmstar hai, kan Celebrities kan ti hai khawm kan sawr naw hle ti thei a nih. Ramdanga um khawpuia um kan ngaisang hai khawm an khuo tieng an hung pan chun kan lo ṭi tah lem daih a. Kan ropui tawl ta naw hle. Incheina le khawvel gadgets changkang tak tak hai nekin kan damna ding bu le hme hai hi anlo pawimaw lem ta sia. Hieng po po a imi sawisak tawl na hai en hin ka ngaituoa mihriem hmel put la chu i hmel hi a sie hle ka ring annawleh zaihlemthiem Delilah ang ilo nilem el dim chuh.
Aw Kawrawna, i thilthaw ṭhatnaw inzawt ding a tam hle lai i thilthaw ṭhat sun hei inzawt pek ka che. Kan chengna leilung hin kha chen hadam hman lova mihriem han kan chawkchawrawi kha hadamna i peka. Boruok hai hung inthiengin, Van hai hung faiin le kan khawl hmang hai khawm an hadam. Sungkuo khat inbie ngai raklo le inhmu inkhât hai imi chuktuoa kan chamlovin hmunkhata kan lengtlanga ,kan inhmangaina hai a sukpung phaa. Insung devotion hai a tam phaa. Online a Sermon, Hlathar, Video dang dang le thiemthil tamtak ami sukhmasawn tawla, hi kawnga hin kan hausa pha hle. Kan nunghak ha'n thlaisuong le fak siemdan tamtak an hrietin an thiem phaa. Kan tlangval ha'n insûng sin le faksiem khawm an thiem phaa. Nuhmei pasal inzawngna kawnga khawm kan quality an sang ta hle ka ring. Mi chunga ṭhat insuo kan hung uora, kan mihriem chanpui hmangaina a pung hle.
Awle, kan lai i cheng ta sia dang ruol ini ta si naw hin chu nang le khawsak kan inchûk alo ngai an tah hi. Imi maksan vat el awm si nawh, kum a liem pha a liempui awm si naw che. Kumthar chenin a tharpui pei el hmel si chea, kan ngai naw bawk si che i laka invengdan kan inchûk a ngai an tah. Kan kut hai hlak a neka uluk a sawp le sabawn ngei hmanga sawp a ngai zing ding an ta hi. Doctor le Nurse ha'n mi an ât sung chaua hnawtsak taka an hmur an tuom angin kan fashion thar chu bau hupna, hmur tuomna hai hi a hung ni ding an tah. Khingtieng panga chu Cosmetics mana kan seng tlawm lem el thei nuhmeiha'n abikin. Kutbawm hai chen khawm a bal le tirdakum hai sukfai nikhuoa chau kan hmang hlak khawm kumpinu'n kutbawm incheinaa a hmang angin kan lo hmang ve a ṭul ta ding ani. Kan du ta'm kan du naw ta'm taksaa natna hrik do theitu fak le dawn hai kan fakin kan dawn a ngai taa, nuom insuksek el an ta naw ding ani hi.
Kan khawvel thuneitu han an mi kharkhip pek el a hung ṭul taa, aw Kawrawna nang a zarin, Zoo a kan ramsa sie hai iengin kan inkhum ve an tah bang kil li nei sunga hin. Suok leh lut chu kan nuomthu an ta nawa, a pawimawna chauvin ami tir an tah. Lo thei lova kan suok chang khawm hung lut nawk pha iengkim siehrana insawpa thuom danga inbel a ṭul ta sia. Kan kut kan sawp sawp na'n a vun an phân thei takngiel ding an ta hih. Hmai, mit, hnar, bau hai tawk an phal ta nawa hienghai hi ita dinga hmun remchang mi hung bel na ding hai chu an ni sia. Tar le naupang hai lem chu tuol an suok kan remti ta naw bur el a nih. Khawlai Lab amania sawttak anlo khum na che keini chungah phuba i hung lâk ni dinga ngai pawl khawm kan um ani. Kan ngai naw hle el che ani ti hi hrie la chu lo hung kher naw ti nih. Tukum Sanghni Sawmhni hi nang i kum ding ani lo hrie unlang chu Nikum ah khan chamsawng nuom vawng kan tih. I hung ta si si leh tukum po nei la tukum a liem ruolin liem ve el ta rawh... Joshua Buhril hla'n a hril ang khan kan insiengna'n a zir nawh nang leh run hmunkhata leng di'n. Kan mawlna'n a zir ngang el sia. Chuleiin liem el ta rawh, liem el ta rawh. Kan ngai naw che.
Go Corona Go
COMMENTS