FOX JOURNAL THUZIEK:
MI ṬI NAW RO
- Pulamte Rose
Awle ramdanga umin, khawsain ka um ngeia. Sienkhawm ei khawvel ngirhmunin a zir naw leiin hi Exodus ropuitaka hin ṭhangin ka khuo ka veng ka chipui hai umnaah ka hung kir a ṭul ta hlauh el.
Ani ngei khawpuia umin khawsak inhawi le changkang na lemah ka um ngei. Nu le Pa bula uma mani piengna ram ngeia khawsak baka thlakhla um le inhawi a um nawh ti hi ei hrietsenga. Amiruokchu ei piengna ram khawm nisien inchukna, sinthawna leh hmasawnna tieng kawng tamtaka a hnufuol lemin remchangna khawm a tlawm lem hle. Chuleiin ramdang pana kal pensuok alo ṭul ta sia. Ei rama fakrukna dam, inchukna hmunṭha vang lei, sinthawna ding remchang tlawm lei le sum hnar vâng lem leiin khawpui lem pana mani insung suk changkang tumna le nuomna leiin mani khuo le tui maksan alo ṭul ta sia.
Chuongchun khawpuia thiem inchuk le sinthawa fakhmuna hai chun ringum takin hieng chen ei lo um taa. Sienkhawm khawvel in a ringphak lo le an singsat naw na tieng daiah natna ṭibaium tak chun ami hung deng ta thut ela. Lockdown puongin a um ta peia. Hi le inzawmin inchukna ni leh sinthawna hmun hai chu a hung inkhar ta ṭhup ela. Sum hnar hai a hung kanga, mani inhmuna um ni nghal lo chu in hluoman le khawrsaw dang dang a ding a hung indai thei ta nawa, sawrkar pa khawma hiengang ngirhmun hi hrepuiin mani veng chita ṭhuoikir dan lampui ngaituoin rem a hung ruot ta hiela. Tamtakin remchanga lain veng ei hung pan ta sup sup a nih.
Vengtienga hotuhai, khawtlang ṭhuoituhai khawmin ringtu ei nina ang hrimin lo lawmlut le khumhran na ding hai khawm lo ngaituo hieuin hma anlo lâka. Tamtak bengvar tak tak le hrietthiemna nei ei um zing laiin tamtak chun in mi ṭi a, natna hung phurlut ding le hri hi pai dinga ringa thlir dan mak tak taka lo thlir an lo um nawk zing bawk.
Chuleiin 'mi ṭi naw ro' , keinikhawm thuawitaka khumhran naa hai inkhumin hotuhai thu kan awi ding a nih. Keini khawmin kan theitawka fimkhur kan tuma, lo kai pal khawma inpeksawng lo dan hi kan ngaituo ve a nih. In nauhai, in sunghai, in chipui hai kan nih. Mi rama inriengtaka rinum tuor amanih a sie tawpa thi le mang tuok neka mani piengna rama rinum tuor chu kan thlang lem sia. Vengtienga hai thlirdan le anmi ṭi leia a rinum khawma tuor el de ning tia veng hung suoklo tawp khawm tiemkhawp kan um a nih.
Hi natna hi a damdawi a um hma chu bo el lo ding ani baka a damdawi an hmusuoka an ensin sung hi thla tam ala ngai ding ani lei hin, vengsuok han hung phur kher naw hai sienkhawm alan dar tho thei ding ani leiin invawngṭhat a pawimaw a nih. Tukum, kumnawk po khawm a tlawmtaka ami la dai ding a nih. Chuleiin iengtinam an vengdan ding ti hi ngaituo lem ei tiu.
Hi natna laka inveng dan ,hieng Immunity sukhrat, Social Distancing, Mask bun, fimkhur dan ding an hril hai po po zawm le inhrilhriet hi a pawimaw em em a nih. Lockdown hin damsung dai thei naw ni a, kumkhuo'n School, Office, Dawr le a dang dang kharsawng thei ni bawk nawng ata. Chuleiin mani seng invengṭhat, invawng dan ding hotuhaiin an ruot hai zawm le fimkhur hi a damdawi umsun ala nih.
Mi ṭi naw ro, Hmangaina mit in mi en unla, ei renga ei damtlang na ding lampui mi ngaituo pui lem ro. Inkhumhran naa mi ṭhenkhat result lawmum lo takel hung suok ṭan sienkhawm, iengtinam hinatna hi ei do thei dinga ti hi inhrilhriet zuol sauh ei tiu.Hi natna hi zuk bo el ding an ta naw lei hin, veng khawm suoksan nawk harsa tah hleng a tih. Chuleiin venga hin ieng ieng am thawin sumhnar siemdan dam ngaituo tlang lem ei tiu, ei dingchanga hnam intodel ei ni theidan ding ngaituo'ng ei tiu.
COMMENTS