MARTYRS' DAY SPECIAL | KAN INNGHIL NGAI NAW CHEU

FOX JOURNAL THUZIEK | MARTYRS' DAY SPECIAL

KAN INNGHIL NGAI NAW CHEU

~ By Pulamte Rose

(...from their perspective..)

Ka hmangai ka unauhai...

Vawisun chu a lum de aw iti chun, Fan/AC hnuoia inhawi takin I chawlhadam thei…

Kei ruok chu nisa hnuoia le ruo hnuoiah nisienkhawm ramhnuoi ka bel a ngai sia.

Vawizan chu avan hawi de aw thlavar hnuoiah inleng ei tiu tiin I ruolhai/sunghai leh inhawi deuvin  sawrthlapui eng hnuoia ṭingṭang leh zai hla inrem el thei...

Kei ruok chu ramhnuoia ṭhangṭham hai mise pawisa hman lovin inralring zingin ka um a ṭul.

Vawituk Pathienni chu ka'n khawm pei naw ngei in ah Movie/Tv/Computer inkhel ka tih i ti thei...

Kei ruok chu maw “eh Chawlni ani hi tie” tia ka sunghai ''inkhawm ding insiem ro'' tia ka ko khek lai annawleh ka nuhmei/ka nu in thawlawm ding a hung sem lai ka hrietsuoka, mitthli leh ka ṭawngṭai tawp hlak.

Khai vawisun chu birthday ei nei ani hi tie iti chun a lawmna ding sa/thuomhnaw I ngaituoa , ivan chawk sawk sawk hlak phurtakin...

Kei ruok chu ka sunghai birthday ka hrietfuk chang chun hun danga kan hmang lai nihai mitthlaa inlang chau chu ka chantawka kalo hlimpui thei umsun chu ani tah.

I in sunga member sukpung ani changin naute lawmumtak hung pieng ding tûng tak le nghakhla taka umin I nuhmei chu duottakin I enkawla, hundang neka felin le hmangaitakin I bawisawm a...

Kei ruok chu ka nuhmeiin kan naute inhlatakin a paia, harsatakin fak ding a zawngpuia, a Pa hmel reng iengtikam ka hmu nawk ding/ka hmu nawk ding am ti chen ngaituoin lungril le taksa inrimtakin a uma. Keikhawm chanchin lo hrie siin iengkhawm thaw thei chuong lovin ka nau chu a sakhmel hlimthla bêk ka hmuphak di'm, ka nauin ka hmel takngiel khawm a hriet hman di'm ti ngaituoin insukpasal takin, zinga inhawi ei tina dingin tiin ramhnuoiah ṭhang nasa nawk zuolin ka lak tah lema.

I ruolhai/sunghai in nuhmei/pasal annei naa ṭhang dingin inhawktak le thafan takin insiema iem aw ka gift ding ti chen ngaituoin phurtakin hun I hmanga...

Kei ruok chu hiengang nilawmum chu ka hrietphak le hrietphak lo tamtakin mi liemsanin ka sunghai khawma mi hrefu siin thawthei nei lovin ka ṭhung na hmun ding awm chu lungril mitthli leh an en liem ve el ta lem a nih.

Christmas/Kumthar le ei nipui hai a hung inher chang hin naupang/puitling phurtakin thuomhnaw thar leh ruoiṭhe ti hai inhawi takin hmang ngei in tih, belpui sa leh Hmar hme chartang, a thu a thâng hai leh tuihnaitak le hnieng-in-hnar takin chen ngei in tih...

Kei ruok chu ka chinlai le sung le kuo leh ieng dang dawn lova kan hmang hun hai kha ngaituoin bienga mittui luongin, fak ding inhnik le inhniknaw chu thudang fak phaka um um fain le dawnin ramhnuoia hun ka hmang pei lem el a nih.

Chuleiin kan vawisunni kan ditthlangna le ram le hnam kan hmangai lei chauva kan hmangai kan khuo le tui, kan sung le kuo hai maksana kan lo inhlan hi ṭhangthar le hotuhai le ṭhuoituhai hin a thlawna inliemtir lovin zinga inhawi ei tina ding hun Ni-eng mawitakel chu hung invarsuoktir dingin ka ngen cheu!

Kan Vawisunni in Zinga dinga kan lo inhlan hi khawvar hung inhmutir dingin ka ngen ngawi ngawi cheu.

Chuong ding chun Chung Pathienin vengin , varna le thiemnain inthuom sien la cheu. Unau inhmangai tak le Ram le Hnam thu ani pha chu thildanga inhrietthiem naw na hai theinghilin ṭhang hung la dingin ka fiel bawk cheu.

Famtah Hmarpasalṭha hai hin kan thlirzing cheu a nih.

HMAR PASALṬHA VULZING SIEN.

KAN HRINGNA CHÂN MIN HLAWSAM TIR LO DINGIN KAN NGEN CHEU!

New Delhi, 15 May 2015