~ Jr Amo
Țum khat chu Instagram a ka mi ngaina deu a story (WhatsApp status update ang) a hin mit la deu el chanchin pakhat a sie chu ka tiem fuk a, chu ka chanchin tiem fuk chu khawvel huopa chanchin ngainuomum tak lo inchang tah Christopher McCandless in a hringnun tawp a hmangna Alaska ramngawpuia Bus upa tak el tah Helicopter hmanga an lakdawkna chanchin a lo nih.
Instagram hi social media platform Facebook le inang vâng si, inang chu ni chie lo, thlalak le video post na ding bika siem a ni a. Khawvel mi inlar hmingthang haiin an hmang nasa a, model hai khawmin an hmang nasa bawka. Ei ni laia ding khawma Țhalai lai hmang a hlaw hle.
Hi chanchin hin ka mit le ka na a lak em a, naw dang ka nghatsan thei der naw leiin chieng lema hre nuomin ka bawzui ta pei a. "Into the wild" movie, Director Sean Penn inrawina a siem niin 2007 kum insuo lo ni tah - Adventure/Drama film darkar 2 neka sei zet el a ni ti chu ka hmudawk a. Tamtak hmelhriet tasa le, ui tawl inleta an inlet thei ta sa a ni khawm ka ring. Nisienlakhawm, ngaituona țhatak el a mi pekin ka hrieta ka lungril po po deu thaw a fenhmang a nih.
Chu neka inhma dai 1996 khan US ziekmi Jon Krakauer chun 1993 a Outside ti-a Chris McCandless a thi chanchin "Death of an Innocent" a ziekna a inthawk non-fiction book a lo siem ta sa a ni bawk.
Chris a pa Walt McCandless hi kum upa loa mi hlawtling ve tak el, NASA le science organization dang dang hai le sin thaw tlâng an ni a. Amiruokchu, nuhmei hmasa le nau hmasa a nei a. Chu chu, Chris a hriet loin kum iemani chen a ip hnung chun Chris chun a hriet ta tho tho a. A pa khawsak dan, a nuhmei hmasa hai le a nau hmasa hai le an lan hmu zing hlak chu a thil dit zawng a ni nawh.
A pa angin Chris hi lekhathiem le thil hre thei mi tak a ni ve a. Nisienlakhawm, a kawl le vela um a sung le kuo, mihriem civilization, khawvel lemchangna nun chu nghawkna tak a nei a. Nuom sienla chu, inhawi ti le a dit dit neia khawsa thei ding, nuom chên a hadam taka um thei ning a tih. Amiruokchu, Chris in chu lampui chu a thlang kher nawh.
Christopher a lampui thlang chu danglam tak el, khawvel mihriem hai um nawna hmun, civilization in a lo paw lo na, phone le electric hai la lut lo, tu mi dang hrim hrim le khawm inzawmna nei loa makhat tea khuonu thilsiem mawi tak tak hai le rawmngawpui hnuoia chengkhawma hadamna, hlimna zawng le hmu chu a thiltum le a lampui thlang chu a ni lem dai a.
Mihriem hai le uma, nitin a sinthaw a fak zawnga khawvel thil harsatna le buoipui ding le ngaituo ding tamtak chu a nghawk ni ngei a tih. Vatehai, ramsa hai le thing le ruo hai laia hun iemani chen bu khuora khawvel le inpawna sat tan hmawk nuom a nih. Chu ang hrim chun, Chris hin khawtlang nun a nghawka ama khata hlimna le lawmna zawngin a sunghai remti naw sa sain ram țuon a rel a nih.
Khawvel hmasawnna zara thil dang dangin a mi hung chimbuoi ta a, ei changkang hrat taluo leiin ei inringhman hmain thil ei hriet ngailo hai ei hriet zung zung a. Chuong hai lei chun ei khawnghat le ei lungril put hai nasataka thlak danglamin a hung um pha ta pei khawm a hawi. A ni der nawh ti thei ding chi a ni ta nawh. Ni danga ei hriet ngai lo le ei lungril a lut ngai lo, tuhin chu sun le zana ei ngaituo thil tamtak a um tah.
Tuol suok ngai lo, ruol le khawm inpaw tak tak lo. Mani pindan sunga makhat te a nun hmang, mi dang le khawvel dang le inpawl nghawktu dam ei hung um ta pei a. Hieng ang hi hriet ding ei um meu ngai nawh, tulai ruok chu, a san dang dang um a ta, hieng ang hi ei hung um pei tah. Khawtlang nun mihriem le inpawlna nghawka insiekieng ei um ta pei. Hieng mi hai hin an khat, mi le inpaw loa an um hin hlimna le inhawi tina chang anga inngaina an nei tawl a nih.
Khawvel lekhathiem hai chun mihriem hi social being ei nih tiin an lo hril a. Social being chu high school kai phak chin hai chun hre fur ei tih. Mihriem, khawtlâng a khawsa tlâng, a mal mal a ințhedar a khawsa ni lo; inringtuo a, a hawna khawsa tlâng ei nina a nih. Abikin, ei ni rawi tak tak hin social being nina indik takin ei phursuok.
Makhata um thei lo, inpan duol duol. Tapte bula ințhungkhawma hohlim tlang. Covid-19 leia sawrkarin mi hai le a buma um lo ding ti a ei himna ding a mi hril lai khawma a hawn hawna um zing hlak ei nina hin makhata cheng le khawsa hlak mihriem ei ni naw zie a suklang chieng.
Chris hin a thiltum chu sukpuitling ngei dingin țhang a lak char char a. Alaska rampui tieng ngha in țuon a rel a, lampuia mi dang an tuokpui hai khawm chun, a hmangruo chawi le a thiltum hai leh rampui hnuoia damkhawsuokna ding an hmu naw leiin thiem taka hne tumin an thawa chu an hlawsam seng a nih.
Mani thiltum a chieng hai chun, ieng ang harsatna le rinumna, lampuia tuor ding tamtak um sienkhawm an tuormuolsuo hlak hrim a. A tawpa chun an harsatna tuor hai chu hlimna le lawmna an chang hlak. Chris ngei khawm hi a tum ah a chieng em leiin, Alaska rampui chu a tum angin a lut ta a. A beisei ang hrimin khawvel dang le inpawna a tawp a, phone a um naw a, mihriem hohlimpui ding an um naw bawk a, motor tlan inlawn le chawkbuoitu dang - rama ran le thil dang dang ti naw hai chu an um naw a nih.
A beisei hlimna le lawmna, inhawi ti na chu Christopher hin a suoldawk a. A tum ang takin hlim takin hun a hmanga, a nun a sukhlim a nih. Nisienlakhawm, hlimna tluontling ruok chu a hmu sa ta naw a, a huntawp inrieng le chavai takin a hmang ta lem dai a nih.
Thla hni vel Alaska rampuia khawsak a rel hnung chun a nuom dan taka hringnun a hmang theina hun chu, chu sung chau chun dittawkin khawtlâng a inzel lut nawk dingin a lungril a siemfel ta a. A thuomhnawhai siemfelin, July 3 chun a lampui ngai hrawin kir a rel ta a. Nisienlakhawm, Chris a tadinga vangduoina lientak ni dingin a fe tienga vadung a palkai el chu vur nasatak a lo intui leiin Teklanika vadung chu feet 75 a lienin incham duoi a lo luong zuoi zuoi chu a hang hmu ta a. A tading chun chu vadung kan chu thil thei a ni ta nawh.
Chuphing chun, a a umna hmun rampuia bus a bawk chu panin a kir nawk ta a. Hi ni a inthawk hin Chris hin inhawi a ti na hai chun an inrelhmangsan ta a. A diary ziek hai khawm chu a tawi țan ta a - Ruo a sur, vadung tan thei ding a ni nawh. Mal takin, thlaphang um takin" tiin hi ni hin a ziek lut țan a.
July 8 in Bus chu a tlung nawk a. A diary a tawi zuol ta hle. Fak ding mumal a nei ta nawa, rama hna le thei fak theia a hriet hai chau ringin an suk khawp a țul ta a. A nun hmang hi a rinum a, thlaphang le lainatum takin a hun a hmang zawm ta pei a. Inhawi ti na hrim hrim a nei ta nawh.
A lekhabua thuziek a nei nuhnungtak chu 107-ni niin, hi taka inthawk a ni 113 na chena a thu zieklut hai chu sinsiena mei mei an ni tah. Tha a nei ta naw a, ziekfung khawm a chel ngil thei ta nawh. A lungrila a hriet hai khawm a kutin a ziekfung a thunun thei ta nawh.
Chris McCandless hmu tâwp a ni a inthawk tiem țana a ni 132 na chun sa pel țhang haiin Chris a thisa ruong chu rama a umsunga inte a a hmang Bus sunga chun an va hmu ta a. Chris hi April 25, 1992 in a tum ram panin a suok țan a, September 6, 1992 in a thisain a ruong hi hmu a nih.
Christopher hin nun damna, chawkbuoitu um loa mal nun ditin Alaska rampui a lut a, a dit ang chu a hmu ngei a. Nisienlakhawm, a thi hma a, a bus umna banga a zieklang hin thu tamtak a hril - "Hlimna indiktak chu midang le ințawm a ni hunah a famkim chau hlak" tiin a tawnhriet a inthawk a hmudawk chu bus banga ziekin a maksan a. A zawng tak hlimna hmu sienkhawm, a zawng lo, makhata hlimna tluontling a um naw ti thu hi a hmusuoka chu a tadingin an hnu taluo ta a nih.
A hringna thapin makhat chauin hlimna tluontling a um naw zie, a nunah chieng takin a tawng a. Thei sien, a ngirhmunin la zir bawk sienla chu sungkuo le kim taka makhat el ni loa hun la hmang tlang chu a duthusam ni ngei a tih.
Vawisun hin Țhalai tamtak el khawtlâng nun nghawk, sungkuo hai le inzie nei nuoia um nghawk, makhat chaua um nuom, makhata chaua inhawi ti lem ding le nun famkim lem ding ringna lientak el fepuitu ei pung pei tah. Amiruokchu, hringnun a pangngai zing naw a, hringnun suonkuol a hung inher danglam pei chun natna hai dam, beidawngna hai dam, rinumna le harsatnain mihriem a bawm phat chun mal nunah innghatna ding hrim hrim a um naw a nih. Chu huna chun, ei sunghai, ei țhenum hai, ei khawtlang ngaina a lien a, amiruokchu a lo inhnu thei tah.
Mal nunah hlimna, inhawi ti na, lawmna tluongtling a um naw a; ințawmna nunah, hlimna indik tak hmu a ni chau hlak a nih. Inpengtuo seng ei ni si a.
(Hi article hi Țhalai Weekly news a insuo hnung insuo sawng nawk a nih)
COMMENTS