Coronavirus hri inleng leia India in March 24, 2020 a ram infepawna po po le inzinna hai po po inringlawk um loa a hung sukchawl thut a, Lockdown a hung puong a inthawk thla 5 pumhlum neka tam awr el a mi khuokhir hnung chun sawrkar thlungpuiin August thla tawpa thusuok a siemna a chun “Zalenna dar – Unlock 4” a hung puong ta a nih.
Hi Unlock 4 a hin ei thaw hlak thil hai po po thaw thei vawng remti na ngirhmun a um ta inla khawm, tlawmin a mi la khuop met a. Sakhuona thil le, puipungna thil hunser hai chu mi 100 chen fekhawm phalna siemin pungkhawm thil hai a hung remti ta a. Chu dungzui chun, mi 100 neka tam lo fekhawmin ei nuom angin ei inkhawm thei ta ding ti na a nih. Aimiruokchu, zalenna puong sienkhawm, invenglawkna thil hmai tuomna hmang, kar vawl vawng that, kut sawp rawn le thermal screening hai chu a khau thei anga hmang dingin sawrkar thusuok chun a hril.
Hieng hai baka hin inneina hunser chu mi 50 neka tam lo le invuina hunser chu mi 100 chena sukpungin a neka tam ruok chu la remti hri loin a siem a. Hieng thupek thar hai hi hung tlung ding September 21 a inthawk an hring tan ding a nih.
State le state infepawna le state sunga infepawna hai po po zalenin a puong ta bawk a. Thuneituhaia inthawk phalna a hranpa a lak tul ta loin state dang annawleh state sunga inzin kuol a thei ta ding ti na a nih. Amiruokchu, school le inchukna hmun hai hrim hrim chu Septeber 30 chena dingin a la sukchawl sunzawm nawk phawt a.
International passenger hai vuongna khawm chu la sukchawl zawmin ramsunga mi chau a la remti hri a nih.
Containment zone a hai chu lockdown hi khau taka fe sunzawm pui pei ni zing an ta. Nisielakhawm, State/UT sawrkar chun state/district/sub-div/city level a hai Containment Zone sung ti naw a chu Lockdown a puong nawk remti a ni ta naw a. Chu umzie chu a zalen thei patawp a anga sawrkar hin riruongna thar a hung siem ta ti na a nih.
Nitin khawvela case insangtak a report mek laia hieng ang hmalakna sawrkarin a hung nei ta el hi chu tlangrampa ngaidan a ding chun thilmak tak el a ni a. JNU a kai pa ta ding khawma nuizatum thil inchang thei a ni bawk.
Amiruokchu, hri inleng hlim a inthawka lo inkhar tan ei ni ta leiin India chu economically in a tlahnuoi nasa ta em em. A hausa le rethei hai nasatakin a mi faksiet a, ei tangka hai chau ni loin thina le rinumna nasatakin a mi bawm a, mihriem ei tam si a sawrkarin a mi enkawl hne tak tak si naw leiin mipui haiin fak zawng le economic activity an nei thei nawkna dingin risk insangtak lain, ditthlang thei ta lo ang hiel ngirhmuna a um ta leia kawtkhar lien lem a hung hawng ta niin an lang a nih.
Economy tieng chu ei hrietna a tlawm leiin hril rawn nawng ei ta. Sawrkarin hri inleng that lai taka kawtkhar lien lem a hung hawng ta si chun, anhawiin lawm a um hle lai zingin, zalen nek hmanin a let tama ei fimkhur a hung ngai ta lem a.
A natna leia thi ei la tlawm khawm ei ti thei a, a na inrik ei um mumal naw khawm ei ti thei bawk a. Andikna chin a um vawng a. Nisienlakhawm, an vawi ei hung tamtak tak chun ei facility in a mi dier naw ding a ni leiin, a vangduoi pawla ei thang nawna dingin ei fimkhur a pawimaw a nih.
Khawlai khawm leng thei, tuol khawm suok thei, ruolhai le khawm inpawl thei a nih. Amiruokchu, ei Pathienthu in iengkim in thaw taphawt a ti ang deu khan, ieng thil ei thaw huna khawm fimkhur tluk a tha a um nawh ti kha hre zingin – damdawi an siemdawk hma poa ding sawrkarin ei thunawn dinga a mi lo thlang pek hmai tuomna hmang, kar awl vawng that, kut sawpfai inzing hai chu ngai pawimaw a tul tak tak ta a. Sap haiin every man for himself an ti ang deuin sawrkarin ei himna ding a zawng ta naw a, ei hringna thapin ama damsuokna ding zawng lem a ni tah ti hi ei hriet a pawimaw a. Ei ni ei damnaw chun, ei thenum hai khawm an dam bik thei tak tak naw ding leiin, mitin mani invawng that a pawimaw zuol hle.
Chun, khawlai ei lengna annawleh ei fena hmun hai khawm positive an lo um pal thei a. Asanchu, local ah an leng mek ta leiin, chuong huna sawrkarin contact tracing a thaw huna inpuong ngam lo ding annawleh tlanhmang am inbihmang ei tum ding si a ni chun, mani kawt khara pindan sungril a inkhum ngat ngat el ding a nih.
Leng ngam a suok ngam chun, a nghawng tlung thei ding hai pawm ngam thap ding a nih. Inhlemna chi a ni naw a, tlanhmang a him theina chi khawm a ni bawk nawh.
Coronavirus hi la bo ngei a tih, iengtik hun am? Ei la puong thei nawh. Damtaka a bo hun ei hmu a, a bo huna hlimtlang taka ei la hriltlang nawk theina dingin thuawina lo hei inchuk nawk fan fan tiu. Hook 'em Horns!
COMMENTS