~ Jr Amo
Ruot ni naw lang khawm, endikna sin hi kawng dang dang a ka thaw hlak a, tu mi tir le phutna țhang loa ka mimal lungril putsuoka ka thaw hlak chu a nih. Hi kawnga hin mimal hnam le tum bik hrim hrim ka nei ngai nawh.
Kum tlawmte liemtah a inthawk khan social media buzawl hi ei tuolchaina tak takin ei hmanga ta a, iengkim deuthaw ei thun lutin ei hriltlangna hmun a ni ta bawk. Chanchinthar ei lakna tak, mi dang le ei inpawna tak hai a lo ni zing el tah.
Nisienlakhawm, fimkhur taka ei hmang zawm pei chu a țul. Thil dang dang a khawm fimkhur ding a nih, tuta țum ruok chu pakhat chau thlur bikin ka hung ziek a, ei rilrem zawng a ni leh zawm tum ei ta, a lo ni rak naw khawma ei ngaituo zawm dingin dit a um ka tih.
Sam ziektu in mihriem dam sung kum chu sawmsari a nih a ti a, a hapna pein hratna leia kum sawmriet chen dam thei a ni thu a hrilsa a. Hi neka sawttak dam khawm ei um tho. Nisienlakhawm, ei tam ta naw hle. Tulai lem chu, hmuomtesep ei thaw nasat leiin ei damsung hun hai hi kei tawiin a um zing a.
Chau chu ni loin, mithiem haiin an hrilna lem chun Covid hri hin mihriem dam hun sung nasatakin a suktawi (ding) thu an hril ta bawk.
Ieng po khawm nisien vawikhat thi chu mihriem ta dinga ruot a ni angin ei thi seng ding a nih, a ziek le tiemtu hai khawm. An hma deu anhnu deua țhe ringawt ei ni lem. Ei thi seng hma a khawvel a tawp hman chun thuhran ni tang a tih.
Chuong laia ka hril nuom chu, mi an thi changa ei laina le ngainat hai khawm an ni thei, social media a in post ding ni awm fahrana mithi ruong inlakpui hai hi thil mawi a ni nawh, bansan thei nisien chu bansan dinga tha a nih, hnâm a um ngawtel.
A bul tienga ka hril ta angin, social media hi ei iengkim a ni tah ti thei deuthaw a um a ni ta a, ei suok, ei leng, ei inzin, ei inhnel, infiem, insel inhal, thlai suong, bu fak le a leng phawt phawt ei kapkaina hmun a ni lei hin a brake ei man thiem a pawimaw takzet. Mi thi ta hnung ruong lem hi chu kapkai lo thei lo a ni ngawt naw chun thaw lo a țha.
A thi ta hnung titak lova, ka Instagram Story le WhatsApp status a ding ti ni awm takin, a hranpa lieu a mithi zal ta hnung inlakpui a kapkai ti hai dam hi, ngainat nat naw thu ni loin thil mawi a ni nawh. Mithi ruong hi inza a um a, in pose pui ti vel hi hnam hmasawn lem haiin an chîng lo thil a nih.
Ei lo inlakpui nuom hle a, social media platform a kapkai ei nuom a ni chun sung le kuo hnai hai remtina lak hmasa phawt a thaw chu a lampui bengvarthlak le thaw dan ding chu ning a tih.
Mihriemin a mawi le mawi naw ei dâwn na hi a tlahnuoi hrat ta em em a, ei hlutna hai khawm ei ngainep tiel tiel a, inzaum ei kaina hai khawm iengma loa ngaina a lien tuol tuol ta bawk a nih.
Mihriem hlutna le inzaumna hi vawng tlat tum zing ei tiu.
Dâwrkâwn : September 2020
COMMENTS