Fox Journal: CCPur sunga student body lien pali țhangkhawm joint student body - MZP Manipur, KSO CCPur, HSA CCPur JHQ le ZSF GHQ hai chun Covid leia school kai thei a ni ta naw hnunga state sawrkarin school fees chungthua thusuok a siem bawzuinain CCPur ZEO le thil dang dang thua DTO, CEO ADCC hai chu zani/vawituk khan student hotuhai hin an inhmupui.
State sawrkarin school hai kai thei a ni ta naw leiin student hai fee chu 30 per cent chau la dingin thusuok a siem lai zingin hi thusuok zawm loa 50 per cent fees la tu an um chungthu hotuhaiin an intlun le inzawmin, hi chungthuah ZEO CCPur chun Krismas hma ngeiin notice ansuo ding thu a lo hril.
DTO inhmupui a ni hunah, tulai computer le staff an um naw leiin sin thawna kawnga harsatna a tuok a ni thu student hotuhai kuoma a lo intlun a. Minister le Commissioner hai kuoma hmangruo pawimaw hai ngenna pek a ni taa chu, thuneina insang lem tienga inthawk hmalakna nghak zing a ni thu hrilin hi lei hin sin zo lo tamtak an tâng thu a hrilsa.
CEO ADCC hi, diesel auto service, bus, winger haiin chuong man an sukpung le an service na kawnga kar awl an hmang naw chungthua inhmupui a ni a. An hmatieng a bawzui ding thu le CCPur traffic le inzawma Parking na chungthu hai khawm ngai pawimaw a um thu hrilin CSO le inkawp a hma lak pei dan ding a lo hril niin student leader palai a țhangve chun a hril.
COMMENTS