Khawvel insieng hnungin ral tamtak a lo lien taa, German ral, France ral, British ral, Japan ral, MNF ral le a dang dang tamtak el a tlung a lo um tah. Mihriem hringna tamtak el suot an lo ni bawk. Amiruokchu, hriet thei chinah Krismas hmang hi țhul a la ni ngai naw a, 1914 Indopui pakhatna ral intawng țhat lai tak khawma Krismas chu an țhul nawa, chu nek chun inkap châwl in Krismas ropui tak an hmang lem a nih (Krismas Inremna thusep ka ziek ah tiem thei ning a tih).
Mihriem ral le hri inleng tekhi lem chu thil remchang le indiktak khawm a ni naw el thei, amiruokchu, hi thu hin ka ngaituona a fak rawn hle.
Covid an țan hlim khan inthin bawng vangin ei ți a, ți khawm a um hrim mihriem hringna a nuoi tel suot tu a ni tah. Hitler in Juda hnam hai a rawt rem tum țum khan Juda mi vaibelsie 6 vel a râwt anga sutdawk a nih. Tuta Covid lei hin mihriem hringna nuoi khat singthum lai chân a ni taa, ngainep el chi chu a ni nawh, mihriem hringna a suot hrat em em a, hringna pe thei hlak ei um si naw leiin ți chu a um a nih.
Sawrkarin lockdown a hung puong a, March 2020 a inthawk khan pungkhawm a hung khap bawk a. Inkhawm hai chen ei inkhawm thei ta naw a, ringnawtu hai khawm an lung a sen zak el an tah sakhuo hmun khar sawt a ni taluo lei hin. Maharashtra state a lem chu an sawrkar an mawsiet a, sawrkar le governor - BJP hai inkar chenah sakhuo hmun hai khar a ni leiin inselna nasatak a lo chawksuok tah.
Sawrkarin India ram mipui tamtak el a mi enkai seng zozai naw ding leiin ram pum huop lockdown khau takin a thla tel ei fepui a. A thei ta ngang naw leiin a thupek a sut a, tuhin pungkhawm la remti chie naw sienkhawm Covid hmaa nundan anga hringnun khal chu ei ni tak tah, hri lem chu a la bo chuong nawh.
Kum chenve neka tam zet biekin inkhawm ei țhul a, a tam lem chun awm ei tiin țha ei tih. Iem a ni chenah tamtakin ei him pha khawm ring a um. Hun a hung liem a, ringtu hai chau ni lo khawvel mihriemin ei tung Krismas (ringtu hai hunpui tak chu ni si) chu a tlung el thei ta dingin a lêr ei zuk hmu țan taa. Amiruokchu, Covid ral a lien leiin Krismas chu abikin Hmar kohran hai laia chu hrilhnuol a hung hlaw ta hle a, chutaka khawm chun Tuițhaphai ruom chu a zuolkai a nih. A vel a vel a ngaituo nawn chu a țha ka tih.
Covid-19 hri hi a ți pawl tak laia țhang ve kan ring. A hri hi ka la hrilhnuol ngai naw hrim hrim a, ți a um ti a hin ka chieng hle a nih ti chu ei hriethmai lo ding ka la zuk zepsa zawk.
Pathienni inkhawm chu a nep ka ti na ni hran loin thla khata khawm vawi 4 lai zet inkhawm theina hun ei nei, damnaw amanih siet ei lo tuok pal a ni khawma Pathienni nawk awlsam taka zuk ti el thei a nih. Amiruokchu, Krismas chu a ni kher nawh.
Pawngpaw sel a Krismas chu Isu pieng ni a ni reng reng lêm ti a țhang khaw nuom ei um chun thuhran ning a tih. Sienkhawm, Krismas hi ringtuhai hunpui, a mi sandamtu, Naupa pek a ei um ni, thutiem sukpuitling a nina, khawvel sandamtu hung piengni, ei hriet seng a nih. Ringnawtu ei deusaw zing zing hlak hai hmana an pathien an biek ngam a, ei ni rawi, ei Pathien biek hun naran el khawm ni lo sandamtu piengchampha ei lawm ngam naw hi chu, kei a gospel naw le a hri ți tak khawm ka lung a khei kher el.
Vai haiin an puja, an festival dang dang hai an hmang. An pathien ta dingin chân an inhuom hmak. An pathien biekna leiin Covid leiin a sangtel an thi, an inkaisawng ti report khawm a la um chuong nawh. Hri inleng țan tir laia Hindu haiin nasataka an intum Delhi Markaaz a Tablighi Jamat pungkhawmna khawm kha an intum ang lawm lawm a ni nawh, hnam khat haiin an hmu pei naw leia a suol phurtu dinga Indian media hai le țhangruola an hmetde a lo ni awm. Inkai chu an inkai met!
Hri an leng leia Krismas hmang lo dinga hrilhnuol a hung ni leiin tamtak chun var thar an insuo a, kum dang Krismas umzie bo der a hmang hlak ni awm takin tukum chu lungril takin Krismas hmangna hun an tih, thu ei laksuol hlak dan hi a pawi. Hri an lenga Krismas ei hmang țha thei naw ding leia tukum a lungril taka hmang tum chau dam ei ni hi a pawi lem. Krismas ei hunpui a hin khawlaia inzapthang mei mei chu tamtak lo um an tih, lungril taka hmang tiemseng lo um bawk ei tih. Vertherna insuo hi thaw chi a ni nawh.
Hri an leng leia Krismas ei hmang naw ding hrilmawina a Isu vawisun hin kan lungril bawng in tlawm a ti a ko thar thut ei thaw tum. Kum dang ei ko ngai naw an suk hawi, ei ko zie, a ti tu hai hin an ko ngai naw am a nih? Ei hmang a ei lawm a ei hlim, ruoi ei țhe leia hlimhlawp chena zu le sa no intung ei ni der nawh. Lal piengchampha a ropui thei patawp a lawm ei ni lem. Mipui ei țhuoikawi (mislead) tum dan hi, in enfie a țul hle a nih.
Hri pawlnel zawnga țhang khaw ding ei nih ka ti na a ni naw a, hri țium na kha a la danglam naw zing.
Mithi inah ei pungkhawm, hla ei sak nawa chu ei hmur inmat vangin titi bawraw ei sep. Bazar a ei fe, thuomhnaw le hmeruo bazar ei kai. Sungkuo ei inhmukhawm, molawm ah ei fe, ei thaw ding le ei thaw hlak hai po po țhul loin ei thaw zing. Ei ți a chu a țul leia ei thaw a ni tawl, tukhawm in thiem naw le dem ding lem chu ei um nawh.
Chuong ang char chun, ei ți zing khawma, Van lal nau peka ei umna, ni ropui tak hi lawm țhul thei ding ei ni nawh. Ei ți sa sa khawma ei thawlui a țul a nih. Ei kohran inkhawmna haia inthawk hri hmudawk a ni thu pakhat khawm a la um nawh, bazar le pungkhawmna hmuna hai an vawi hmudawk a ni thu hai ei hriet a chu ei fe ei țhul der nawh. Ieng lei? Asanchu, lo thei loa ei fe a ngai, a ei thaw a ngai lei a nih.
Krismas khawm chuong ang char chu a nih, a pawimaw leia lo thei loa ei hmang țul a nih. Ei nuom nuom ei thaw hai bansan chuong si loa Krismas hmang ei bansan tum el hin, ei sie pawimaw hne tak naw zie an lang.
Curfew chungthuah, Krismas hmang le thil dang dang thaw a chawkbuoi nawa, ei thaw ding thaw thei zing a nih. Ei ta dinga țhalem ngaituoa sawrkarin a zam a ngai thei a nih. Indik a tih, a mi enkai hne nawh. Chuong laia ei ngaituo sa ding chu, Krismas dar inri hma kha chen kha curfew zam chungthu hrim hrim hrillang in a um naw a. Ringnawtuhai ni pui le hun pui hai hmang a ni vawng a inthlang hai zofel a ni hnunga an hung zam a nih. Hri hi a kaisang thut a ni naw a, September-October khan a lo kaisang dai tah. Ringnawtuhai rorelna a hin iengkhawm hrillawk thei a um naw a, thei ni phawt sien chu mi rekbet char an tum a. Uolau takin an la ngam naw chau a nih.
Sawrkar dân zawm a țha ti zâwng a țhang ei khaw tum a ni chun, ei rawngbawlna kawnga sawrkar dan ieng iem ei zâwm ti hai khawm ennawn țul mei a ta, sawrkar dan ei zaw kim le kim naw hai fie lem a ei en thar ngai bawk a tih. Khuo le tui țha nina sawrkar dan zâwm a nih, amiruokchu, ei zawm tum dan hi ei remchang ang peia hermil ei tum a ni chun indik dingin ka ring chuong kher nawh.
Ni tlawmte liemtah khan Silchar lai kulmut hai an inhrosa a, an sakhuo zuituhai Krismas hmanga fe fe an vuok ding thu an khekpui dur dur an tah. Chu chu NE, ei țhenum ram el a tlung a ni ta chu. Chuong laia ei ringna sukda zawngin țhang ei lak zing bawk, a pawi sei thei hle ding a nih. Hi lai biela hin Krismas ringtu le ringnawtuhai in Krismas an hmangtlang hlakna hmun a ni nghe nghe.
Lungril taka Krismas hmang hi a țha a, inkhawm neka țha tawk a ei ruot a ni lem ta a hawi a. A ni si chun, hri bo huna khawm biekin pan bansanin, lungril takin inkhawm lem ta inla, Krismas le ei ni pui hai khawm biekina lawm le hmang ta loin lungril takin lawm lem ta inla, ei ngaidan put mek dungzui chun ei tak lem ding nisien a hawi maw.
Krismas hman pawimawa ei ruot zo ta nawa, kohranin ei hmang țha ngam ta naw a ni chun ngam naw ding dang chu tam thar hle tang a tih.
Isu vawisun hin kan lungril bawng in tlawm ah hung insieng la khawm, Krismas chu Covid ralin a lo hnebân tah!
COMMENTS