Kum 2021 hung inher dawkin, ei ni hmanghai chu hrietnaw karin an lo liem nawk ve pei el ta a. Chuongang chun vawisun ka piengchampha January 5, kum 1991 a inthawk intana Pathien zar chaua ka lo hmelhriet ta chun a mi'n tuokpui nawk ta chawt el, lawmum ka tiin a mi thuoi tlungtu Pathien chungah ka lawm bek bek a nih. Lawmna ding tamlo kum, hripui leia ei harsatna tuok danhai kha a chin a lienin ei inhmai ring a um nawh. Inchukna tienga hlak ei sang ei nauhai an bahla ding zie khawm a la hung in hersuok pei dingah ngai ei ta. Thinain bang lovin ei insung chithai a mi suosal zing bawk. Kum 2020 rinumzie mi'n tawmpuitu vawng in nih a, a then a let tam hman khawmin. Chuonga Krismas ei hang hmang ta ma chun, lawmna ding chu a dapin ei dap vawng vawng a ni deu tak ie. Chuonglai zing chun keiin hi hmaa ka lo ngaituo phak zen zen lo Pathienin a mi zuk inthlirtir chu, vangnei hi kan ti ta em em a, ka hamthat zie ka hmu suok zuol thei tah a nih. Chu thu chu January 3 khan Hmar Christian Fellowship-ah Thalai Sunday kan hmangna a chun ka lo hril suok tah nghe nghe a, ka piengchampha a hin suklang nawk nuomna ka nei leiin ka hung ziek suok ta a nih. Ka thalai chanpui le ruol ditum tak hai, in mi ditsakna hai leiin lawmthu ka hrila. Chun, ka thu hung ziek hai hi lungril taka lo ngaituo zawm ve dingin ka ditsak cheu.
~ Hebrai 13:15
Chuongchun ama zâra chun inpâkna inthawina hi Pathien kuomah inhlân rop ei tiu, chuchu a hming inpâkna dinga ei hmûrhai ra chu a nih.
Tuta thang (Generation), a bik takin tlangval, nunghak le nupaa insiem mekhai hih ei ham a tha bek bek a nih. Hieng anga hun tha le inhnar uma ei pieng a ei seilien hih a hlutna hre hmai pal ei ti kan lau khawp el ie. Kum tamtak liem tah laia Pathienin Adam le Evi a siem tana inthawk AD 33 vel chena pieng ni inla hlak Israel-hai in ni ma lo chun, ei hnam nang le kei chun Sandamna ding lampui hi a umnaw hul huk a. Pathienin a hnam tlanghai meu khawm kha khir taka a thuoi, a sawizawi an nih ti ei hriet kha. Chu hnunga inthawk ei pi le pu hai chen hlak Chanchintha lan dawng bawk lo chun ei fena ding chu hril ngailoa chiengsa ani nawk bawk. Ei pi le puhai kha lu la hnam, thlarau be a inthawi hlak an lo nih a. Kei a inthawka kan thlatu hai ka pa le kan hang suidawk thei chen chu generation panga chen kan suikir ve thei hram. Ka Pa V.Lalthalien Zote (1964 - ...), ka Pu Saihlunthang (1934-1994), ka Pu Pa Saithovung (c.1893-1974), ka Pu Pu Ler-ut( c. 1840-1910). Ka Pu Saithovung pieng hun hi ring dana kan sie a nih, tarkuna thi a ni leiin le a thi kum hi hriet a ni leiin. Ka Pu Ler-ut khawm hi tarkuna thi a ni ti hi ka Pa in ka Pu Saithovung a'nthawk a dawng phak leiin. Hieng anga ka hung ziek dawk kher hi pawimaw ka ti em lei le hienga ziekdawk thei dinga ka Pa'n a mi hril hriet phak ve hi a hlu ka ti em a nih. Ka Pu Ler-ut hi samsei bum, thiempu sinthaw lo ni ve phak ngat a na, piengtharna chu hre phak lo le chang phak loa thi chu a lo ni ve der el. Ka Pu Saithovung le a nuhmei ka Pi Hmuni-hai ruok chu ka Pi Hmangnu (ka Pu S.Hlunthang a nuhmei) rawngbawlnaa tar hnunga piengthara thi an ni ti chu kan hriet dan a nih. Hang ngaituo chun 1910 in chanchintha ei dawng phak ve chau a , anleh chu hma le chuong hun lai vel Senvon a inthawka hla taka um ei thlatu sang tamtakhai chu Piengthar loa thi an ni el ding a'n na maw ti chu ei zuk ngaituo vawng vawng thei a nih. Chanchintha zar chauin ka Pu S.Hlunthang khawm Old Churachand-ah Mission School a hung tum thla in kan intanna khuo Leisen chu a lo suoksan ta a. Pawl sawm chen an chuk zoin, Pu Chawnga (Pu Rochung a Pa) School-ah Bible (diploma course tlukpui) an chuk nawk ta pei a. Chuongchun, Zirtirtu le Pastor sinhai chelin Thenmuol le Muolbem a hai an lo khawsa ve kha a nih. Senvona hlasak thiema in lar ve ngat ka Pi Hmangnu le hung in nei peiin, Pathien rama an thei ang angin rawng an bawl mup mup hnungin tuhin chu an mi lo chawl hadam san ve ta a, Vanram ah. Harsatna tamtak fethlengin, ei pi le puhai, ei pahai chen khawm tiemsain an mi lo nerthleng pek ta a. Chun ei mihrang famtah Pastor Thangngur tihai khan Chanchintha kha lo invakvai pui ngam ta da'l hai sien chu iem ei chang reng ding maw? Pathien zar le annihai zar ei zo a, tu ang ngirhmunah hin ei ngir ve phak a ni ti a chieng hle el. Tu anga huntha chanchintha a khawm andik tak le a felfai lema thisenhai chen khawm an lo in luon pha pui, martyr-hai chen khawm an lo changpui hnunga ei dawng hi vangnei tak ei nih. Tuta kuta ei chel thei, internet a hai tiem ve theia um Bible ngei khawm harsatna tamtak paltlanga hung suok ani zie khawm hril hriet ei ni rawp hlak khah. Ei va zuk hamtha ngei de maw !. Population Reference Bureau (PRB) in a record dan chun mihriem a pieng ta po po hi 108 Billions ei ni tah ti a ni a. Tuta a damzat po (2019 record) 7.5 billion hang pei chun 100 billion vel chu mihriem hi ei thi tah ti ning a tih. Chuonghaiah chun Piengthara vanram kai ding iengzam um an ta? Ringna indiklo anni hun laia an lo fepui dana thi ve iengzam? ei pi le puhai anga thlarau lo be ve tawpa thi tamtak um bawk an tih. Hienghuna lo pienghai chu mi lungsietum tak an va ni ngei. Ei ham a lo va tha char char de eh maw! Pathien ropui raw seh!
~ Sam 78: 4,6,7
" Chuong chu an nauhai kuomah ip naw mei ni a,Ruolthar hung dinghai kuomah LALPA inpâkna thu le, A hrâtzie le a thilmak thawzie chu hril lem ei tih.
Ruolthar la hung um ding, Naupang la hung pieng dinghai chun an hriet theina dingin,Chuonghai chu an thova, an nauhai kuomah an hrilsawng peina dingin,
An beiseina chu Pathien-ah an innghat theia,Pathien thilthawhai chu an theinghil naw a, A thupêkhai chu an zawm lemna dingin "
Chuonglai zing chun mawphurna rik tak chu tuta thang (generation) a hin an nghat ta tlat el leh. Khawvel a changkang pei a, a buoi nuoi nuoi sap zing bawk. Kum 2020 sung ringawt khawm biekinhai hawngtha thei loin ei um ta zing el. Kum 2021 sung hin ieng ang takin am maw ei um ding ti chu ei zawna khawm a ni seng ka ring. Ei pi le puhaia inthawka ei i dawng Chanchintha khawm hih a da deu deu khiet el dim?, hienga ei fe pui pei chun leh. Ei nauha'n an nauhai hrilsawng thei di'n eini hin ei hring pui am? Digital khawvela um chu ei nih ngei, a thuhai chu bo ta naw ni a, chanchintha khawm a la tlingzo zinga a thilthaw theina khawm a la pangai zing. Amiruokchu a hlutna chu a bo thei tlat an nawm. Ei hringpui nawa ei ngaihlu naw chun, ei nauhai ei tu le te han an inhnar ve ngot dingah ka ngai nawh?. Hmet kawlawk ding hlak a tam tah, en ding inzen a bo ta nawh, inhnikna ding zawng hlak a tamin, awlsam taka ban phak vawng an ni tah. Chanchintha hin eini lai umzie nei tlawm deu deu a ta, a thilthaw thei zie khawm iengma loa siemtu ei ni lem el rawi maw. Nakie chu tienami-in ei lan changtir el awm hih, Wales rama Kristienhai angin. Chu ding chun nang le kei thang lang ei ta, khawlai hmuna khawm um inla Daniel anga Babulon ramdang daia va um, danglam biek rieuna a nei ang khan. Hotuhai le thawkpui haiin indikna leia an chim khawpa ei um chun, Pathienin i nauhai chu malsawm a ta, i tuhai malsawmin vakam mawia lo tuok ding nei ve ngei ei tih. Chuong a ni naw chun ei generation hi bohmangna lampuiah thuoi pal ei tih ti inlau a um takzet el. A maw chu nang le keiin ei phur ding a ni si a!
Pathien ropui tak raw seh !
~ Immanuel L. Zote
January 5, 2021
Pune
COMMENTS