EFCI General Assembly vawi 48na chu Manipur khawpui Imphal hmun ah

Fox Journal|Shillong| Thlaṭau 12, 2021: Evangelical Free Church of India inkhâwmpui lien General Assembly vawi 48na chu Imphal Presbytery mikhuol na in Thlaṭau ni 17 - 21 2021 sûng hin Insukhrât Rawh (Be Strong) ti thupui a hmang in St. Paul Retreat Centre, Lamlongei, Mantripukhri, Imphal, Manipur hmun ah nei ani ding.

Rev. Simon L. Darngawn, Secretary, General Assembly, EFCI a inthawk thu ei dawng dân in inkhâwmpui nei na ding Retreat Centre a hin palai ding hai cho tlung thei an ta, Thlaṭau ni 17 in tlungkim in ni 22 in Centre hi an suoksan nâwk nghâl ding a nih. Management Committee indin ania, an ni hin COVID Test, SOP, Medical, fâk le dâwn le a ṭûl dang dang hai EFCI Executive Committee le Imphal Presbytery ṭhuoitu hai leh mawphur an tih.

Inkhâwmpui sûng hin Executive Council le Assembly rorêl ṭhangin Committee dang dang rorêlna nei ani ding bâkah Chawimawina le Ordination hun hmang ni bawk a tih.

17 Thlaṭau 2021 (Nilaini) - Palai tlungkim ni, Inkhâwmpui hawngna le Committee inṭhung

18 Thlaṭau 2021 (Ningani) - Committee inṭhung

19 Thlaṭau 2021 (Zirtâwpni) - 104th Executive Council Rorêl

20 Thlaṭau 2021 (Inrinni) - 48th General Assembly Rorêl le Worship Service

22 Thlaṭau 2021 (Pathienni) – Worship Service

Palai hai hrietding pawimawi:

1. Imphal khawpui moderate climate ani ta leiin thuomhnaw lum taluo chawi a ngai bek nawh.

Puonthu le Puonsil ding khawm chawi ngai naw nih. a hmunah fai tâwk tak el palai hai pêk seng nîng an tih.

2. Palai by Road/Air a hung ding haiin Imphal tlung huna taxi/motor ṭûl ding hai in an hmatieng Management Committee Chairman/Secretary inhriettir nisien.

3. Sa fa theilo (Vegetarian) hai chun an hmatieng Management Comm Chairman/Secretary kuomah intlun ding.

4. Assembly sûnga File,Tui, Bible hai chawina ding handbag hung chawi ngai naw nih. Imphal Presbytery in Palai popo ta ding Souvenir gift, Hand bag a buotsai.

5. By road/Vuongna - State danga inthawka hung ding hai ILP (Inner Line Permit) le inzawmin Adhaar Card Original (xerox 3 copies) le Pasaport Photo Copy (3 Copies) chawi ding, Check Post-ah Original in entir tul a ta, Photo Copy submit ding.

Adhaar Card nei lo hai chu Voter ID card khawm phal a nih.

(With inputs from Mangement Committee, 48th EFCI General Assembly & Secretary, General Assembly, EFCI GHQ)