PALAI BÂWNGTE: ÂN THLÂK DANGLAM DÂN

(Sîngtȗrdumbêl huna inthawka digital age chena).

 

Dr Lal Dena





Nunhai sim ang ân danga,

Ei nun sim ang ân dang a. LH. 2, p.231.

 

Palai chu  mi dang le mi dang kâra thu intluntu a nih. Chu thu intlun chu thu tha, thusie khawm a ni thei. Palai bâwngte ti ruok chu nunghâk le tlangvâl kâra thu intluntu a nih. Chu thu intluntu ding chun ei pi le puhai chun hmangruo hran hran an lo hmang hlak. Ei tienamia Tuolvung le Zâwlpal chanchin ei tiem chun Zâwlpal thi thu Tuolvung kuoma intluntu ding khan vahui an tir thu ei hmuh a. Chuleiin ei saihla ţhenkhata khawm –

 

Ka umkhawsâwt lunglêng rêng hi,

Nêmten tuor ân tak ngei; 

Di zȗn ngai, di ko thiem,

 Huiva tir thei chang sien;, 

Ka suilunglêng biethu hril dingin - 

 

ti dâm ei hmuh. Ei khawtlâng nun ân thlâk danglam le hmasâwn ang peiin palai bâwngte dinga ei hmangruo hmang hai khawm a danglam pei a nih. Hi palai bâwngte inthlâk danglam hi ho tak angin inlang sienkhawm, ei khawtlâng nun hmasâwnna inkhina le bȗkna ţha niin ei hriet. Chu hung inthlâk danglam dân chu sîngtȗrdumbêl huna inthawka digital kum chena mi hi thusep hin hung thailang a tum a nih.

 

Tienlai ei pi le puhai kha dumbêl le tirbȗr hâwp an lo chîng hlak. Pasal chun dumbêl narân el khawm ni lo, sîngtȗrdumbêl an lo hâwp hlak a. Tlangvâlhai chun nunghâk an dit zâwng deuh ha’n an ngaizâwng ve am? ti hriettheina dingin an dumbêlah dum inbengtir dingin an rawi naupanghai an tir hlak. Nunghâk khan dumbêl chu inthâwl huntâwk chara lo bengpêkin meiling inchuonin a hung pêk kîr nâwk chun, nunghâk khan a lo dit ve ti hriet theina ţha tak a nih. A beng ping taluo ruok chun nunghâk khan a dit nawh tina a nih. Dumbêla mei inlâkkaitira inthawkin “dit zâwng naw mei pêk” ti ţawngkam khawm a lo suok pha a nih. Dit naw/ngai naw mei pêk chu thingthu hring an pêk hlak. Dit zawnghai ruok chu meiling an pêk hlak. Dumbêla dum beng le meiling chun palai bâwngte sin umzie inthȗk tak a lo hril a nih.

 

Mingohaiin an mi hung awp hnungin nun a hung inthlâk danglam pei a. Dumbêl bânsanin lekhaziel hâwp an hung chîng ţan a. Tlangvâlin nunghâk a lêngpha lekha an zuoltir hlak. Lekhazuol chu patzai rawng dang dangin an khit hlak a. Chuonghai chun inentir an nei vawng hlak. Thuin amani bauin amani mi dang kuoma hrilsuok si lovin lekhazuol khitna rawng chun palai bâwngte sin an lo inthawtir hlak. Lekhazuol chu samzaia an khit chun “I ta dingin ka pumin ka’n pêk” tinain an lo hmang hlak. Patzai senin an khit chun “I ta dingin thisen suok huomin ka’n pêk” tinain an ngai. Ţhenkhat ruok chun lungsen inentirnain an ngai. Lekhazuol têlpui kârah pahni samzaia inkhit kawp a um chun, “I ti hun huna innei kan pei zing. I thu ka lo nghâk el a nih’ tina a nih. Lekhazuol chu patzai vâra an khit chun, “Ka ta dingin mi naran i nih” tina a na; a duma an khit chun “Ka dit naw che” tina a nih; (ţhenkhat ruok chun pat duma khit hi lungawina le ditna inentirna a nih a ti khawm an um tho). Pat enga khit chun hmangaina an entir a; pat hringin an khit chun “I ta dingin ka hring,” ti inentirnain an lo hmang bawk. Thanghluihai chun lekhazuol khitna patzai rawng chu palai bâwngte sin kâwk dang dang an lo inneitir hlak a lo nih.

 

Ţhanghluihai chun a hun zirin sâwlhna le fanghma khawm palai bâwngte sin an lo inthawtir châng a um. Lova an fe châng, in tieng inlawi hmasa lem lem ‘sȗl inthlieka aw’ an ti hlak. In tieng lo inlawi hmasatu chun lo lam ţhea sȗlhna a lo sie hlak. Chu chun ieng dang ni lovin inngainatna hmangaina inentirna a nih “Ka theinghil ngai naw che” an tina a nih.  Fanghma tlung huna chun ngaidi hna chungah fanghmaa hming ziekin an insȗlthliek hlak. Chu ding chun fanghmakelrâng an naw leh fanghma tuoiţha an thlang hlak. Fanghmaah chun hming khenin lo lamţhea ngaidi hna phain an insȗlthliek hlak. Chuongang insȗlthliekna fanghma chu ngainat a umin, lampuia an fâk el ngai nawh. Sie le ţha theira fâk hma hun a la ni leiin tu khawmin mani ta ding naw chu an themin an lâk ngai nawh. Chuong ang sȗlinthliekna chu hla chena khawm hiengang hin an lo insam hiel hlak:

 

Fanghma tuoitirtê’n sâwl a mi thliek, 

Chang naw sienkhom a chia sie ka nuom ,

Vângnei thilthuin a ţo el dîm aw!

 

Fanghma hmin ţha, a mu chang ta hnung chauh a chi dingin an sie hlak. Fanghma tuoitir, a dâwng ti hriet ngawi ngawi, a mu khawm la um ţha lo a chi dinga sie hang nuom hiel chu a kâwk ân thȗk veng veng ngawt el. 

 

 

Ei rama Mingo rorêltu an hung ruol ruolin missionary khawm an hung a. Sikulhai indinin ziek le tiem ei mi hmasahai chun an hung thiem ţan a. Ziek le tiem an hung thiem ruol ruolin a hmaa palai bâwngte inentirna neia an lo thaw hlak hai chu a hmatiemin an hung bânsan pei a. Khuo khat vêng khata um khawm lekhathawnin an inhmangaina thuhai an hril ta lem a nih: chu hmangaina thu hrilna lekhathawn chu ‘thaikawi bâwngte (love letter) an ti hlak. Chuong ziekna ding chun lekhapuon khawm an dittui bîk hlak. Lekhapuon buong (writing pad) a chung vawitieng sîra partea inhuon “forget me not’ ti inziekna kher kher an lo hmang hlak. Dâkbâwm naran khawm an dit nawh a. Dâkbâwm buong deuh thak “Remember me”ti inziekna kher kher dâm an hmang bîk hlak. Lungrila sipliem lethathawna an hang ziek a. “Ka hmangaaaaaaai tak, ka lungril lalnu” ti dâmin an hang ţan a, a thlum thei patâwp, kutziek khawm a mawi thei patâwpin an ziek hlak.Tlangvâlin/nghâknuin thaikawi bâwngte a hei invuongtir chun hieng hin ân thla hlak: 

 

Ka thaikawi bâwngte va fe pei la,

‘Ţhe naw biethu’ ti’n di Thangnunnêm/Vâlbuong vâ’n tlun la;

Lo chawi ngei a che a ţanglai ah

tiin. (Thangnunnêm/Vâlbuong aiin an ngaizâwnghai hming an ziek lem hlak). A lo remchang êm êm. Sipai suţi hmang zo hringpur dova Lucknow –a kir nâwk tah le lekhainchȗk khuo danga sikul kai hai ta ding tak takin a remchâng zuol. Khawsâwt bei dawngin, 

 

Love letter thai ding ka huol nâwk tah,

Therefore I hope I am making to marry;

Did you ever love me my darling?

Awi aw, did you ever love me my darling?

”ti’n ngaituona po po sengin thaikawi bâwngte an ziek nâwk hlak. A lo remchâng bawk. 

 

Hmêl inhmuh har mah se, pârte,

Thaikawi bâwngte lêng zêl se;

Hmangaihna thu chauh hril tawn zêl hi,

A tâwk e, ka tân, pârte. (Thlȗk: Ka tlantu khawlâm I um?)

 

Thu lai po pova hlu le ngainuomum tak chu hmangaina thu hi a nih. Ei thu le hla sukhausatu, dâwn suktamtu tak khawm a lo nih. Tirko Paula khawm khan, “Hmangaina chu chatuon daih a nih”(DV) a lo ti kha tie! ‘Tangkasum le thil dang hrim hrim chu bat a thieng nawh’a mi ti pêk a, hmangaina chauh ku hi bat thieng a nih ti a mi’n fui lawm lawm a nih!

 

Mihriem nun a hung inthlâk pei a, hma ei hung sâwn pei a. Khawpuiah chu kâwlphe meivar dâm ei hung hmang pei a. Thaikawi bâwngte khawm a ţȗl hle naw chun hmang ta lovin tele-bawngte ei hung hmang nâwk ta pei a. Zani ta inhmu chauh khawm inhmu nawna sâwt taluoin ei hriet hlak.  Tele-bâwngte 238032 ei hei dial a, “Hellow, baby! Long time, no see. Long time, no hear…I’ve missed you so much….”ei hei ti kuol vêl a, hriet naw kâr dârkâr khat nêka sâwt dâm ei lo hmang hlak. 

 

Hun a liem pei a. Hriet naw kârin computer age-ah ei lo chuongkai a. Khawpui hmun tina cyber café-ah internet hmangin khawlai rambunga um khawm ei inbiekpui thei tah a. Chutaka inthawka inhmêl hrieta, ei nunghâk iemani zât rauhvin ramdang mi pasal nei khawm ei um tah. Lâwm a um. Computer age tia khawm digital age ei chuongkai nâwk pei a. Smart phone ei hung hmang a, FB/Whatsapp hmangin hmangaina thu khawm sinsiena hmangin ei inhril lem tah. Mihriem lunglim (lekhapawi inkâpnaa tawka lim) ân ziek chun hmangaina inentirna a nih a. Morse code le type-writer hmang a nia inthawk khan hawrawpa sei taka ziek ngai lova inhriettawn theina sinsiena hmang a hung ni tah lem a. Tu lem hin chu emoticons (icons of emotion) sinsiena tam tak a hung suok tah a, cell phone-ah nuom ang ang a thu ziek kher lovin hmang thei (smiley) a tam tah. Ram tina an hmang dân inang vawng naw sienkhawm, a tlângpui tlâwmte chauh zuk târlang ei tih: hmang tlânglâwn tak mihriem lunglim heart hmangaina inentirna, 143= I love u; 14344= I love u very much; 1437= I love u forever; 4U= for u; *O*=ngaina hre naw; (‘-’)= nghawk um; :O= makti; LOL= laugh out loud (a ri neia innui huk) le a dang dang.

 

Khi a chunga palai bâwngte chi tum tum ei târlang hai khin an hun senga hlutna le pawimawna an lo nei seng. Dumbêl age le digital age inkâra khawtlângnun hung inthlâk danglam pei dân chiengtakin an mi hril a, hnam hmasâwn le sâwn naw hrietna darthlalang an nih. Mihriem themthiemna (technology) hin hma a sâwn pei a, tulaia ruoltharhai hin zanita ei nun rohlu tam tak chu an theinghil pei ding a nih. 

 

Tu lem hin chu sȗngtina a lu kip deuh thawin smart phone ei nei tah. Ei phone-hai hlak chu hmu nuom um le infiemna chi hran hranin a sip. Naute ei ti hai khawma an nuom nuom an hmet dawk el. Ei lâ’n iempui nâwk deuh deuh. Nupui pakhatin, “Mobile phone hi ka theida a nih. Bazar kai dingin ka naunu kum 15 mi leh kan suok a. Ka naunu chu phone hmangin tu amani message a thawn char char a. A nu, a bula inţhung le car khaltu a mi dawnsak tah nawh. A nu nêkin a kutphaa phone chite chu ân lal lem tah” tî’n a ziek. Smart class room, online class, digital class, hahaha! Ei changkâng sâwt! Ei ţhalaihai hlak chu ei bula taksain inţhung hai sienkhawm, an lungril le thlarau chu hmun dangah a um lem a.

 

An khum pindana um hai sien, mobile bawk an hmet nâwk char char hlak. Hei ti met inla, class III inchȗk lai chauh khawmin, “It’s my life, my choice. Don’t interfere…” an ti nâwk a. Hei ha! Tuta hnungtieng khawvêl la hung danglam pei a, ei tu-le-tehaiin ieng PALAI BÂWNGTE am an la hung hmang ding? ti dâm ka suongtuo neuh neuhva, mi hriet fȗk lovin ka lo buoi rȗk vieu hlak.

COMMENTS

Name

Articles,95,B Lalsanglien,1,Bakshi,1,BUONGLIENKUNG,11,Cleaven Hmar,1,DIAMOND MALSAWMTHANG TUSING,1,Dorothy Hmar,2,DR ROCHUNGA PUDAITE,1,EDWARD TC HRANGATE,1,Elson J Thiek,1,Fox Journal,2,Fox Journal thuziek,2,Fred Lalramsan Khawbung,1,GB Niropui,1,Guwahati,2,H ZATE,2,Hal Ziek,1,Hla Ziek,145,Hmangaina Hla,11,Hmar,12,Hmar articles,9,hmar culture warriors,1,Hmar hla,2,Hmara,1,Hnam Hla,16,HP RUNREMTHANG,6,HRANGLIEN SONGATE,1,I-League,1,Inruoksiekna,1,JAMES SONGROLAL,2,Joshua L Thiek,12,Jr Amo,5,KAMA SUNGTE,2,L KEIVOM,7,Laldena,4,LALHMINGTHANG,2,LALHMUNSANG CHANGSAN,1,LALKHUM KEIVOM,1,LALNGHATLIEN SONGATE,1,LALRAMLIEN KUNGATE,1,LALSANGAWI,2,LALTLANSUNG MIHRIEMATE,1,local,2,Local New,1,Local News,498,LR NGHINGLO,1,LT. NEITHANG,1,Manipur,1,National News,29,News,567,Nursing,1,PASTOR KHUONGA,1,PASTOR LIENRÛM,3,PASTOR V.T KAPPU,8,Pathien Hla,105,Paulsiemlien,1,PAUTINKHUP,1,PI ROSIEM,1,PI RUNCHAWNG,1,Poem,1,REV THANGNGÛR,13,REV. T KHUMA,1,REV.NGAMLALCHAWL,1,Rimawi,11,Robinson Zote,1,Royal Global University,1,ROYE,1,Season 1,1,SEMA FAIHRIEM,2,Sielmat,1,SONGLIENTHUOM,1,Sports,11,SUMA,1,Thanglienthuom,1,THANGLIENZO,1,THANGZARLIEN,2,Thuziek,1,TRAU,1,Tribute,1,UPA DANGVEL,1,UPA L.MUONVEL,1,UPA LALNUNTLUONG FAIHENG,1,UPA LIENSUN,1,UPA LIENTLUNGVEL,1,UPA NGAMA,5,V L LAWMA CHANGSAN,1,VINCENT HEKTE HMAR,2,Vocal Champ,1,World News,23,ZATAWN,1,
ltr
item
FOX JOURNAL: PALAI BÂWNGTE: ÂN THLÂK DANGLAM DÂN
PALAI BÂWNGTE: ÂN THLÂK DANGLAM DÂN
https://1.bp.blogspot.com/-uAE9PSVGWAk/YKx6zHUAxWI/AAAAAAAAD5o/5Hl07iJSxo0MpklNZcHwOh2tucP0CgEQACLcBGAsYHQ/s16000/final.jpg
https://1.bp.blogspot.com/-uAE9PSVGWAk/YKx6zHUAxWI/AAAAAAAAD5o/5Hl07iJSxo0MpklNZcHwOh2tucP0CgEQACLcBGAsYHQ/s72-c/final.jpg
FOX JOURNAL
https://www.foxjournal.in/2021/05/palai-bawngte-thlak-danglam-dan.html
https://www.foxjournal.in/
https://www.foxjournal.in/
https://www.foxjournal.in/2021/05/palai-bawngte-thlak-danglam-dan.html
true
6798813121781721492
UTF-8
Loaded All Posts Not found any posts VIEW ALL Readmore Reply Cancel reply Delete By Home PAGES POSTS View All RECOMMENDED FOR YOU LABEL ARCHIVE SEARCH ALL POSTS Not found any post match with your request Back Home Sunday Monday Tuesday Wednesday Thursday Friday Saturday Sun Mon Tue Wed Thu Fri Sat January February March April May June July August September October November December Jan Feb Mar Apr May Jun Jul Aug Sep Oct Nov Dec just now 1 minute ago $$1$$ minutes ago 1 hour ago $$1$$ hours ago Yesterday $$1$$ days ago $$1$$ weeks ago more than 5 weeks ago Followers Follow THIS CONTENT IS PREMIUM Please share to unlock Copy All Code Select All Code All codes were copied to your clipboard Can not copy the codes / texts, please press [CTRL]+[C] (or CMD+C with Mac) to copy